Dageblatt
En Dageblatt oder Daagblatt, faken ok eenfach Blatt (in Oostfreesland: Blad(d)je oder Journaal) is en Blatt, dat, so warrt dat internatschonal seggt, tominnst veermal in'e Weken rutkummt.[1] Hüdigendags is en Dageblatt meist vun Maandags bit Sünnavends to kriegen. Dor warrt allerhand verscheden Saken in kunnig maakt un dat schall for en allgemeen Publikum gellen. Dat gifft Regionalblöer un overregionale Blöer. En sunnerliche Form vun dat Dageblatt is dat Boulevardblatt. Meist all Blöer in Düütschland kaamt midderwielen an'n Morgen rut.
Geschichte
ännernAs Vorweser vun dat Dageblatt könnt de Narichtenbulletins Acta diurna ankeken weern, de Gaius Julius Caesar in dat antike Röömsche Riek in dat Johr 59 v. Chr. anfungen hett, as he röömschen Kunsel weer. Se sünd tominnst bit 235 n. Chr. rutgeven wurrn, man wohrschienlich nich jedeen Dag. Dat eerste Dageblatt in de Nutied is an'n 1. Juli 1650 in Leipzig rutkamen: Twee Johre na dat Enne vun den Dartigjöhrigen Krieg hett de Drucker un Bookhöker Timotheus Ritzsch unner den Naam Einkommende Zeitungen (up Platt ungefähr: Narichten, de (just) rinkaamt) sess Mol in'e Weken en Dageblatt rutbrocht. Elke Utgave bestunn ut veer Sieten in dat Format vun um un bi 13,5 mol 17 cm. De Uplage leeg bi 200 Stuck. Sett weern de Einkommenden Zeitungen in Metall-Lettern, druckt wurrn sünd se mit'e Hand up en holten Druckerpress.
Belege
ännern- ↑ Revised Recommendation concerning the International Standardization of Statistics on the Production and Distribution of Books, Newspapers and Periodicals. In: UNESCO, Office of International Standards and Legal Affairs. 1. November 1985.