Detlef Eichinger

Detlef Eichinger (* 30. September 1955 in Stood) is en düütschen Verwaltungsbeamten.

Eichinger is 1955 in Stood boren. He hett von 1974 bet 1977 en Lehr as Feernmellhandwarker in Hamborg maakt. 1978 is he to’n Grundwehrdeenst bi de Bundswehr inropen worrn. Een Johr later is he Beroopssoldaat worrn un hett en Offzeersloopbahn inslahn. He hett von 1980 bet 1983 an de Universität von de Bundswehr München Elektrotechnik studeert un weer na dat Studium as Offzeer an verscheden Standöörd von de Bundswehr in Düütschland. 1998 is he Kummandör von dat Staffs- un Feernmellbatalljoon 1 worrn, dat in de Lent-Kasern in Rodenborg statschoneert weer.

Bi de Wahl to’n eersten hauptamtlichen Börgermeester von de Stadt Rodenborg kunn he sik 2001 dörsetten un hett dat Amt to’n 1. Oktober 2001 övernahmen. He is 2006 wedderwählt worrn. Bi de Wahl an’n 25. Mai 2014 kunn he sik mit 40,4 % von de Stimmen aver nich gegen sien Gegner Andreas Weber dörsetten un hett dat Amt as Börgermeester to’n 31. Oktober 2014 afgeven müsst.

To’n 1. Januar 2015 hett Eichinger sik as Musikmanager egenstännig maakt un is nu ünner annern Manager von de Band Lake.

Eichinger hett twee Kinner. He hett an’n 16. Februar 2018 sien Levensgefährtin freet.

Weblenken

• Websteed von Eichinger sien Firma (hoochdüütsch)