EMF (Grupp)

EMF weer en britsche Rock- un Pop-Grupp ut Forest of Dean, Gloucestershire.

Historie vun de Grupp

EMF is in’n Sommer 1989 vun fief Schoolfrünnen grünnt worrn. Dat weern James Atkin (Singer), Ian Dench (Gitarr),Derry Brownson (Keyboard), Zachary Foley (E-Bass) un Marc Decloedt (Slagtüüch). De Naam EMF steiht för Epsom Mad Funkers. De Spood keem unvermodt gau in’n Rahmen vun de Madchester-Bewegung. Twüschen jemehrn eersten Optritt in en Pub vör een poor hunnert Lüüd un dat Ünnerschrieven vun den eersten Platenverdrag leeg nich veel mehr as man en half Johr. Op en vun de Kunzerten harr en Talentsöker vun de Platenfirma EMI de Musikers sehn.

De eerste Single vun EMF keem in’n November 1990 ünner den Titel Unbelievable rut, en Rock-Leed mit Dance-Elementen, bi dat Samples mit Spröök vun den US-amerikaanschen Comedian Andrew Dice Clay bruukt weern. Dat Leed stünn na wenige Weken nich blots in Grootbritannien, man ok in’t europääsche Utland in de Top 5 vun de Charts. In de USA keem dat Leed sogor bit op’n eersten Platz vun de Charts. Dat eerste Album Schubert Dip keem bi de Kritikers goot an un hett sik ruchweg twee Millionen mol verköfft. Den Titel vun dat Album verkloor de Gitarrsspeler Ian Dench dormit, dat he – wenn dat nödig weer – geern ut Schubert sien Warken en poor Akkorden afkieken de.

Een Johr later keem toeerst de Unexplained EP rut, folgt vun dat tweete Studio-Album Stigma. Ok dit ALbum kreeg vun de Kritikers veel Loov, liekers keem de Verkoopstallen lang nich so hooch wie bi de eersten Plaat. Ok mit dat drüdde Album Cha Cha Cha, dat eerst na en Poos vun dree Johr rutkeem, künn de Grupp nich wedder an den eersten Spood anknütten. Mit dat Cover vun den Monkees-Hit I’m a believer keem noch mol wedder en kommerziellen Spood, de aver nich bit na de nächsten Single anholen de. Kort dorna hett sik EMF denn oplöst.

In’t Johr 2001 geev dat noch mol en Tosamenkamen för en Kunzert, dat de Grupp in London speelt hett. In’n Ansluss is vun EMF en Best-Of-Album publizeert worrn. 2002 is denn de Bass-Speler Zac Foley an en döödliche Överdosis vun verschedene Drogen (Kokain, Heroin, Alkohol, Ecstasy und annere) doodbleven.

De annern Musiker vun EMF hebbt inwtüschen annjere Projekte, as to’n Bispeel Amanda Ghost un Beauty School. 2007 güng üm, dat de Grupp sik weddervereenen wull. Gegen Enn vun 2008 weer EMF as Vörgrupp vun Carter USM bi twee Kunzerten in Birmingham un Brixton to sehn.

Diskografie

Albums

• 1991: Schubert Dip
• 1992: Unexplained EP
• 1992: Stigma
• 1995: Cha Cha Cha
• 1998: Back 2 Back Hits
• 2001: The Best of EMF: Epsom Mad Funkers

Weblenken

• Interview mit EMF (März 2011)
• Was machen eigentlich EMF? (hoochdüütsch)