Madchester

Madchester is de Beteken för en musikaalsch Bewegen, de de britische Musik Enn vun de 1980er un Anfang vun de 1990er Johren prägt hett. Bekannt weer se ok ünner den Begreep Manchester Rave oder kort Rave (De Begreep Rave weer ’n beten later denn ok för Techno-Veranstalten bruukt un is in denn Tosamenhang denn ok bekannter worrn). Dat Zentrum vun disse Bewegen weer de Stadt Manchester, sünners in den legendären Club The Haçienda.

De Musik, de dor speelt worrn is, weer en Mischen ut Independent, Psychedelia un Dance Music. Faken is se dormols ut en dormols noch ne’e Tosamenarbeit twüschen Gitarrengruppen un Dance-Musik-Produzenten tostannen kamen un barg Elementen vun den klassischen Indie-Rock aver ok de Dance-Tunes, de op Ibiza jüst geern höört weern.

Bekannte Gruppen, de de Musik to de Tiet mit prägt hebbt, weern ü.a. de Inspiral Carpets, Happy Mondays, The Stone Roses, The Charlatans, Primal Scream, The Soup Dragons, The Shamen, Northside, EMF, New Order (tomeist in Tosamenarbeit mit DJs as Paul Oakenfold as Produzent oder Neemischer) oder elektronische Interpretatschonen as 808 State oder A Guy Called Gerald. De Madchester-Bewegen güng Mitt vun de 1990er wedder torüch. Dat leeg to’n een doran, dat de Musisker keen ne’en Infäll mehr harrn – wat to’n Deel woll ok an den wiet verbreedten Drogenbruuk ünner de Musikgruppen leeg – aver ok an de Pleite vun dat Musiklabel Factory Records, de de Szeen weertschopplich un organisatoorsch düchtig drapen hett. As denn Gruppen as Oasis grötteren Spood harrn, güng de Vörherrschap in de britschen Musik an den Britpop över, de aver op keen sünnere Stadt mehr fastleggt weer.

Weblenken

• Madchester vun Jonathan Schofield (engelsch)