Evert

Evert (ok Everdt, Ebert oder Ewert) is een plattdüütschen Vörnaam for Jungs.

Herkamen

De Naam kummt vun den olen germaanschen Naam Eberhard vun her. Dor steekt de beiden Wöör Eber (dat heet Ever) un harti (dat heet hart oder stark) in. Denn bedutt de Naam soveel, as De so stark is, as een Ever oder De den Ever sien Kraft hett.

De plattdüütsche Naam

Allerwegens kann een bi plattdüütsche Vörnaams sehn, dat de olen Naams afkört un tosamentagen sünd. Babenhen is dat bi germaansche Naams mit de tweede Hälft -hart oder -hard so, dat düt Woort so tosamentagen is, datt dat bloß noch as een Anbacksel (Suffix) utsütt. Dat is dat Anbacksel -ert. So is ut Eberhard Evert wurrn, ut Gebhard Gevert, ut Eckehard Eggert ut Eilhardt Eilert. Ebert un Ewert sünd man bloß annere Schrievwiesen to den Naam Evert. Düsse Naam is in dat Middelöller in Sweden een Modenaam ween. Dat keem woll vunwegen de Kontakten mit de nedderdüütschen Kooplüde vun de Hanse tostann.

Tonaams

Vun düssen Vörnaam kaamt nu ok de plattdüütschen Tonaams Evert, Ewert, Evers un Ebert vun her. De bedüüt so veel, as : Ut Evert sien Familie

Fundöörd

• 1720 in Bremen (Everdt)

Kiek ok nah bi

• List vun plattdüütsche Vörnaams

Weblenken

• Wofaken un woneem de Vörnaam in Düütschland vörkummt: Evert, Everdt, Ebert, Ewert