Edgar Dean Mitchell

Edgar Dean „Ed“ Mitchell (* 17. September 1930 in Hereford, Texas; † 4. Februar 2016 in West Palm Beach, Florida) weer en US-amerikaansch Astronaut. He weer de sösste Minsch, de den Maand betreeden hett..

Edgar Mitchell, NASA-Upnahm

Utbillen

1952 hett Mitchell an dat Carnegie Institute of Technology en Studium vun de Bedrievswertschap afslooten un is de US-Marine bitreeden. Dor wurr he as Pilot för Opklärensflüüg insett, wurr Fleegeroffizier un övernehm 1958 as Offizier vun de Air Development Sqadron 5 Upgaven in den Arbeitsberiek för Forschungsprojekte. In sien Tiet bi de Navy hett Mitchell 1961 den Masterafsluss in Aeronautical Engineering an de Naval Postgraduate School maakt, as ok 1964 den Doktertitel in Aeronautics and Astronautics an dat Massachusetts Institute of Technology.

Ruumfohrt

Van 1964 bit 1965 weer Mitchell Marinevertreter vun dat MOL-Projektes. An’ 4. April 1966 wurr he mit de fievte Utwahlgrupp in dat Astronautenkorps vun de NASA upnommen. Gemeensam mit Gordon Cooper un Donn Eisele bill he de Ersatzmannschap vun Apollo 10, Mitchell weer dorbi as Pilot vun de Maandlandefähre vörsehn.

Sien eersten un eenzigen Ruumfloog hett Mitchell 1971 as Pilot vun de Landefähre vun Apollo 14, dat darte spoodriek bemannt Maandlandeünnernehmen. Kommandant bi disse Mission weer Alan Bartlett Shepard un Pilot vun de Kommandokapsel weer Stuart Allen Roosa. Wiels de Mission hett Mitchell twee Butenbordinsätze maakt mit över negen Stünn Gesamtdüer. Up de Rückfloog to de Eer hett Mitchell Experimente to överrsinnlich Phänomene dörführt. De privaten Experimente hemm aber kien verwertbor Ergevnisse brocht.

Vör den Floog vun Apollo 14 wurr dat Apolloprogramm nochmals körter plaant. De letzt Maandfloog sull nu mit Apollo 17 stattfinnen. Dorum hett de NASA för de Ersatzmannschapen vun de verbleeven noch nich besett Flüüg Apollo 16 un Apollo 17 nich mehr jung Astronauten, de dree Flüüg later to Hööftmannschap upstiegen sullen, sonnern all erfohren Astronauten indeelt. För Apollo 16 bestunn de Ersatzmannschap ut den Kommandanten Fred Wallace Haise, den Piloten vun de Kommandokapsel Stuart Roosa un Edgar Mitchell as Maandfährenpilot. All dree harrn all een Apollofloog achter sück. Wenn Charles Duke utfallen weer, harr Edgar Mitchell somit de Mögelkeit harrt, de eerste Astronaut to wurrn, de tweemal up den Maand lannen dee.

Nah de NASA

An’ 1. Oktober 1972 is he bi de NASA utscheeden un hett en eegen Firma, de Edgar Mitchell Corporation in Palm Beach (Florida) grünnd. Buterdem grünn he dat Institute of Noetic Sciences, dat sück mit Bewusstweenverännern befaat, as he dat bi sück sülvst nah de Lannen up den Maand beobacht harr. Nah sien Utscheeden ut de NASA hett sück Mitchell starker esoterisch Themen un deren Erforschung towendt.

Sonstiges

Mitchell weer verheiraadt un harr fiev Kinner, He is an’ 4. Februar 2016, blots een Dag vör den 45. Johresdag vun de Maandlannen vun Apollo 14 storven.

Edgar Mitchell weer Mitbegrünner vun de Association of Space Explorers. 1970 wurr Mitchell dör Präsident Richard Nixon mit de Presidential Medal of Freedom uttekent, een vun de beid hööchst zivil Utteknungen vun de USA.

Filmografie

• 1975: Reise ins Jenseits – Die Welt des Übernatürlichen

Weblenken

Edgar Dean Mitchell. Mehr Biller, Videos oder Audiodateien to’t Thema gifft dat bi Wikimedia Commons.

• Websteed vun Edgar Mitchell (engelsch)
• NASA Images (engelsch)
• US-Astronaut: "Menschheit ist nicht allein im All" 21. April 2009, Der Standard
• Interview mit Edgar Mitchell bi exopolitik.org
• Websteed vun dat vun Mitchell grünnd "Institute of Noetic Sciences" (engelsch)
• spacefacts.de: Körtbiografie