Eduard Rudolf Johann Geiger

Eduard Rudolf Johann Geiger (* 12. April 1854 in Crone an de Brah; † 27. Februar 1922 in Göttingen) weer en düütschen Verwaltungsbeamten.

Geiger is 1854 as Söhn von en Koopmann in Crone boren.[1] He weer op de Gymnasien Brombarg un Küstrin un hett an de Universitäten Leipzig un Straßborg Juristeree studeert. In de Studententied is he 1874 Maat von de Leipziger Burschenschaft Dresdensia worrn. Na de Eerste Juristische Prüfung 1877 weer he Eenjohrig-Freewilligen.[1] Dorbi hett he den Rang von en Seconde-Leutnant kregen.[1] Na de Militärtied is he 1878 Referendar bi de Oberlandsgerichten Brombarg, Frankfort/Oder un Stettin worrn.[1] Von 1880 bet 1883 weer he Regerungsreferendar bi de Regerung in Stettin.[1] Mit de Grote Staatsprüfung is he 1883 Regerungsassesser worrn.[1] Nadem de Kreis Leh an’n 1. April 1885 nee billt worrn is, is Geiger dor de eerste Landraad worrn.[1] 1906 hett he den Rang von en Gehemen Regerungsraad kregen.[1] He is bet 1917 Landraad in Leh bleven.[1] Sien Nafolger weer Theodor Pieschel. In’n Mai 1918 is Geiger na Göttingen ümtagen.[1]

Geiger weer von 1899 bet 1919 Afornten för den Wahlbezirk Leh in’n Provinziallanddag Hannover.[1] He is ok as Maat in’n Rekenutschuss von’n Provinziallanddag wählt worrn.[1] To’n 1. September 1919 is Geiger aver utscheden un Theodor Pieschel is för em narückt.[1]

1897 hett he den Roden Aadlerorden veerte Klass kregen, 1907 den Kronenorden drüdde Klass un 1918 den Roden Aadlerorden drüdde Klass mit Sleif.

De Geigerwald bi Flögeln hett na em sien Naam kregen.

Footnoten ännern

  1. a b c d e f g h i j k l m Beatrix Herlemann, Helga Schatz: Biographisches Lexikon niedersächsischer Parlamentarier, 1919-1945., Verlag Hahnsche Buchhandlung, Hannover 2004, Sied 120