Ehrhart Glaser

Ehrhart Glaser (* 11. Juli 1927 in Zwickau; † 7. Januar 2006 in Ninndörp) weer en düütschen Politiker von de CDU.

Glaser is 1927 in Zwickau boren. He weer dor op en humanistisch Gymnasium. Siene Schooltied weer ünnerbraken dör en Tied, in de he in’n Tweten Weltkrieg Soldaat weer un dör de sowjetsche Kriegsfungenschop. Glaser hett denn 1951 dat Abitur maakt. He hett an de Universitäten Halle un Hamborg Tähndokteree studeert, 1958 dat Staatsexamen maakt un twee Johr later sien Dokter (Dr. med. dent.) maakt. Na de Tied as Assistenzdokter in Hamborg hett he sik 1959 as Tähndokter in Ninndörp dallaten.

Glaser weer siet 1955 Maat von’n Ring von Christlich-Demokraatsche Studenten un de Junge Union. 1956 is he in de CDU rin.

He hett 1965 de „Ninndörper Gespreken“ von de CDU begrünnt. In mehr as 250 Veranstaltungen hebbt dor beropen Referenten Vördrääg to polietsche, sellschopliche un soziale Themen hollen. 1991 hett he dor för dat Bundsverdeenstkrüüz kregen.

Glaser weer von 1973 bet 1993 Vörsitter von’n CDU-Kreisverband Horborg-Land un dor later Ehrenvörsitter. He weer eersten Viez-Vörsitter von’n CDU-Bezirksverband Lümborg un Maat in’n Lands- un Bundsutschusses von de CDU.

Von 1968 bet 1972 weer he Raadsherr von Ninndörp. Nadem Ninndörp 1972 Deel von de Gemeen Rosengoorn worrn is, is he siet dat Johr Raadsherr in’n Gemeenraad von Rosengoorn ween. Dor weer he von 1972 bet 1986 ok Vörsitter von de CDU-Frakschoon. Von 1976 bet 2006 weer he Afornten in’n Kreisdag von’n Landkreis Horborg. Von’n 21. Juni 1986 bet 20. Juni 1990 (ölvente Wahlperiood) weer he för den Wahlkreis Seevdaal Maat von’n Landdag von Neddersassen.