Ekel (Anatomie)
As Ekel (in de Fackspraak Glans Penis) warrt bi de Söögdeerten de vördere dickere Deel vun’n Pint betekent. In’n normalen Tostand warrt de Ekel tomindst deelwies vun de Vörhuut överdeckt, wenn de Pint besneden is, liggt so normalerwies free. Bi en Erekschoon tütt sik de Vörhuut mitünner torüch, so dat de Ekel denn ok faken deelwies freeliggt.
Opbo
ännernAn de Ekel ünnerscheedt man den Ekelrand (Corona glandis) un den Ekelhals (Collum glandis), de sik in Richt na’n Pintkörper ansluten deit. Bi de Hunnen warrt de teemlich lange Ekel in en langen Deel (Pars longa) un en Zibbeldeel (Bulbus glandis) indeelt.
Blangen dat Vörhuutband (Frenulum) un de binnere Vörhuut (Praeputium) tellt de Ekel to de an’n dullsten erogenen Zonen, wobi de ünnere Ekelrand sünnere Bedüden hett. De Huut vun de Ekel (Cutis glandis) wiest en wenig verhoornt Platenepithel mit Talligdrüsen op. Se bargt tallrieke fre’e Nervenennen. Ünner dat Epithel leegt Meissner-Körpers un sünnere Genitalkörpers för dat haptische Wohrnehmen. In’n Normalfall (nich besneden) is dat Epithel bannig dünn (2-3 Zelllagen), so dat ok en swack Reizen al föhlt warrn kann. Na’t Besnieden billt sik ’n wat starkere Verhoornen dör’t mechaansche Reizen. De Nervensignalen warrt över den Nervus dorsalis penis leidt un speelt en sünnere Rull bi’n Orgasmus un bi de Ejakulatschoon.
Dat Binnere vun de Ekel warrt vun den vörderen Afsnitt vun’n Miegröhrswellkörper (Corpus spongiosum penis) billt, de ok as Ekelswellkörper (Corpus cavernosum glandis) betekent warrt. Woans de bi verscheden Söögdeerten utprägt is un dormit ok, wo groot de Ekel wiel en Erekschoon warrt, is ünnerscheedlich. Blangen de Minschen hebbt ok de Hunnen un de Peerd ümfangrieke Swellkörpers. Bi Poorhover gifft dat dorgegen blots wenig Swellkörpergeweev. De Ekel bargt dor mehr Binngeweev un en venöös Plexus, de ünner’t Epithel liggt.
Binnen de Ekel verlöpt ok de Miegröhr, de an de Spitz vun de Ekel münnt (Ostium urethrae externum). De Miegröhr kiekt dorbi bi vele Söögdeerten tippelordig över dat enn vun de Ekel rut, wat as Miegröhrfoortsatz Processus urethrae betekent warrt. Bi de Peerd liggt dat Enn vun de Miegröhr in en düütliche Lunk, de Ekelgruuv (Fossa glandis), de mehrere Blindsäck (Recessus) bargt.
De Övergang twüschen de Ekel un den Schaft vun’n Pint billt de (Ekel-)Kranzspleet. In’n Vergliek to den Pintschaft is se wat dicker. De Funkschoon vun de Ekel, de in’n Vergliek to den Rest vun’n Pint düütlich breder utformt is, warrt stammhistoorsch in’n Sinn vun de Spermienkonkurrenz verkloort: bi’n Sex warrt dat Sperma, dat sik mööglicherwies noch vun en Konkurrenten in de Scheed vun de Fro befinnt, dör’t Bewegen vun’n Pint jüst so as bi’n Wedderghaken ruttransporteert. [1]
Ruchweg teihn Prozent vun de Mannslüüd hebbt an’n Ekelrand tallrieke lütte Hoorntippels. Disse Tippels sünd nich krankhaft un mööt ok nich wegmaakt oder behannelt warrn. Tyypsch sünd Hoornbilln ok bi Katten, wo se as „Pintstickels“ betekent warrt.
Krankheiten
ännernEn Ekelsweer warrt in de Medizin ok as Balanitis betekent. Tomeist kummt dat tohopen mit en Sweer vun de Vörhuut (Balanoposthitis).
En Tumor vun’n Pint kann sik ok an de Ekel utbilln. De Erythroplasie is histoloogsch en wohrhaftig Carcinoma in situ. Bi Hunnen gifft dat en överdrägbore Tumorform, dat as Sticker-Sarkom betekent warrt.
Modifikatschonen
ännern
Bi eenige Mannslüüd warrt de Vörhuut dör Besnieden wegmaakt. De Fienföhlichkeit vun de Ekel warrt dordör mit de Tiet minnert, vunwegen dat sik en Keratinschicht (Hoornhuut) billt, de de Ekel schuult.
Blangen medizinische Grünnen warrt de so nöömte Zirkumzision in vele Kulturen vör allen ok ut rituelle oder religiöse Grünnen maakt, faken al kort na de Geboort oder in de fröhen Kinnertiet. Dat Besnieden vun Minnerjohrige warrt to’n Deel aver ok as Körperbesehren kritiseert.
Dat gifft dree Orden vun Piercings, de dör de Ekel verloopt: de Apadravya verlöpt piel, de Ampallang waagrecht un dat (oder de) Dydoe geiht dör den Ekelkranz. Dat Splitten vun de Ekel oder vun’n helen Pint warrt as Subinzision oder Bifurkatschoon betekent.
