De Orgasmus, ok woll Klimax, Hööchdpunkt oder Kloorkamen nömmt, steiht an’t Enn vun den Geslechtsverkehr bi Mannslüde un Froonslüde. Wenn de Geist un ok dat Lief sexuell stimuleert weert, denn warrt tolest de Orgasmus beleevt un bringt en besunners schöön Geföhl tostann. Dor liggt dat an, dat de Minschen Lust kriegt up Sex. Up düsse Oort hölpt de Orgasmus dor to, dat de Minschen sik vermehren doot.

De Orgasmus bi de Minschen ännern

De Mann ännern

Bi den Orgasmus vun den Mann treckt sik de Prostata un de Muskeln an den Grund vun den Penis in en gauen Rhythmus tohopen. Vunwegen düt Tohopentrecken vun de Muskeln warrt dat Sperma dör den Pint nah buten sprütt. Dat warrt denn „Ejakulatschoon“ nömmt. Wie veel Sperma afsprütt warrt, dat is ganz ünnerscheedlich un liggt ok an de Tiet, de aflopen is siet de leste Ejakulatschoon. Wenn dat al twee Daag oder länger her is, denn is dat normal, wenn dor1-4 Milliliter bi rutkaamt (dat sünd een bit twee Teelepels). Man wenn de Mann just sien annern Hööchdpunkt achter sik hett, denn gifft dat minner veel Sperma, kann angahn dat sünd bloß en poor Druppen. Verscheden Mannslüde sprütt dat Sperma woll en Meter wiet weg, bi annern flutt dat just so even ut den Pint. För dat Geföhl vun den Orgasmus is dat ok wichtig, wie lang dat Vörspeel duert hett un wie dull dat dreven wurrn is.

De Orgasmus duert normalerwies 3 bit 10 Sekunnen. An un for sik, man nich jummers, maakt dat richtig Spooß. Möglich is dat ok, dat een en Orgasmus hett sunner Ejakulatschoon un annersrum, en Ejakulatschoon to hebben sunner Orgasmus. Wenn dat losgeiht mit den Orgasmus, denn weert de Klüten grötter un de Klüten weert hoochtrocken in den Büdel. To’n Orgasmus kümmt dat, vunwegen dat de Ennen vun de Nerven an den Penis prickelt weert, besunners in dat Flach vun dat Frenulum bit hen nah de Klüten. Nich ganz so dull geiht dat ok an den Rand vun de Ekel. Nah den Orgasmus hett de Mann en Tiet vun Roh nödig, de kann vun een Minuut bit to en halve Stunn duern. In düsse Tiet maakt em dat keen Spaaß, wenn de Pint anröögt warrt.

Froonslüde ännern

Ehr dat de Froonslüde en Orgasmus hefft, warrt de Kutt fuchtig un de Klitoris warrt grötter, vunwegen dat dor mehr Blood dörströmen deit. Dat gifft Froonslüde, de weert över dat ganze Lief hen root, ehr dat se en Orgasmus kriegt. Dat liggt dor an, dat mehr Bloot dör de Huut dörfleten deit. Wenn en Froo dune bi den Orgasmus is, denn verswinnt de Klitoris in en Foolt vun Huut un de lüttjen Schaamlippen kriggt en düster Klöör. Wenn dat mit den Orgasmus losgeiht, denn so warrt de Vagina 30 % lüttjer un veel Bloot flutt dor dör. De Boormudder (en groot Muskel), de Kutt un de Muskeln in den Unnerbuuk treckt sik bi den Orgasmus rhythmisch tohopen. Verscheden Froonslüde kriegt en duchtigern Orgasmus, wenn de G-Punkt stimuleert warrt.

Wenn de Orgasmus üm is, denn kümmt de Klitoris wedder rut un binnen 10 Minuten is se so groot, as jümmers. Verscheden Froonslüde hefft keen Paus nödig, so as de Mannslüde, man könnt glieks up den neegsten Orgasmus tostüern, wenn dat mit dat Stimuleern fuddergeiht.

Dat gifft ok Froonsminschen, de könnt ok ejakuleern. Man dor kümmt keen Sperma bi rut un ok keen Urin. To düt Oort vun Ejakulatschoon warrt „Squirting“ to seggt. Bit herto is noch nich richtig unnersöcht, wat vun Oort vun Stoff dat is. Nich all Froonslüde könnt „squirten“.

Wie faken een en Orgasmus hebben kann ännern

Jungs un junge Mannslüde seggt faken, dat se mehr as een Orgasmus an en Dag hebben könnt. Egol, of dat nu vunwegen Masturbatschoon passert oder vunwegen dat en Froonsminsch dor siene Hannen in’t Speel hett. Je öller de Lüde weert, üm so minner warrt dat mit den Orgasmus, man wenn een sexuell aktiv blifft, denn kann he ok jeden Dag en Orgasmus hebben. Bi de Froonslüde sütt dat woll so ut, dat de Tall vun de Orgasmen dor an liggt, wie goot se sik mit ehren Partner verstaht. Wenn en Froo oder en Mann keen Orgasmus hebben kann, denn warrt dor Anorgasmie to seggt.