Ekzeem
En Ekzeem (greeksch έκζεμα (ekzema), wat upgahn is (as Deeg), up Düütsch ok Jöökflechte, warrt en Sweren vun de Huut nömmt, wo een sik nich mit ansteken kann. In de Spraak vun de Medizin is dat en Dermatitis (oder en Epidermodermitis). Dat dat üm en Ekzeem geiht, kann een sehn vunwegen dat de Huut jöken deit, vunwegen dat se root warrt un dat se dick warrt un lüttje Blasen smitt, bavenhen gifft dat Schuppen. Bi de Allgemeenmediziners is dat Ekzeem de Orsaak vun de meisten Besöök bi'n Dokter. In de Medizin in Düütschland weert „Ekzeem“ un „Dermatitis“ faken övereen bruukt, man an un for sik ümfaat en Dermatitis noch mehr, as en Ekzeem. Wenn een dat genauer seggen will, denn so mutt he vun en Ekzeem as vun en „Dermatitis ekzematosa“ snacken. Beide Wöör meent avers, dat de Huut jichens wat nich verdregen kann.
Orsaken
ännernEkzemen könnt verscheden Grünnen hebben:
- en Grund vun buten her (exogen). Dat is, wenn en Ekzeem tostanne kümmt vunwegen en Kontakt mit Stoffen, wo dat en Allergie gegen gifft. Dat sünd faken Metallen oder Giften (vunwegen de Sünn oder wecke Chemikalien)
- en Grund vun binnen her (endogen). So is dat bi de Neurodermitis (de ok „endogen Ekzeem“ nömmt warrt), man ok bi Ansteken vunwegen Bakterien un wenn to veel Tallich fleten deit.
- afsunnerliche Grünnen, wenn de Venen nich affleten könnt, wenn dat to en Allergisch Kontaktekzeem kümmt, wenn dat en Toxisch Kontaktekzeem gifft, man ok bi dröge Huut.
Indelen
ännernNa de Duer vun de Krankheit weert de Ekzemen so indeelt:
- akut Ekzeem mit grote oder lüttje Blasen
- duerhaftig Ekzeem, wenn de Huut inrieten deit, un wenn dat Schuppen gifft un Hoorn.
Na ICD-10 weert de Ekzemen so indeelt:
- L-20: Atopisch Ekzeem
- L-21: Seborrhoisch Ekzeem
- L-22: Winneldermatitis
- L-23: Allergisch Kontaktekzeem
- L-24: Toxisch Kontaktekzeem