Ernst Andreas von Cronhelm

Ernst Andreas von Cronhelm (* 1666; † 1729) weer en düütschen Verwaltungsbeamten.

He weer von 1692 bet to sien Dood 1729 Amtmann von dat Amt Mesborg. Na sien Dood hett sien Söhn Andreas Heinrich dat Amt övernahmen.

Nadem siene eerste Fro Dorothea Sophia Corfey an’n 8. Januar 1704 doodbleven weer, hett von Cronhelm an’n 18. Februar 1706 in Borgwedel in twete Eh Elisabeth Margaretha von Eltz (21. Juni 1680-2. September 1726) freet.

Ut de eerste Eh stammt de Dochter Apollonia (4. August 1696-1761).

In de Kark in Mesborg hängt en Epitaph för von Cronhelm. He un siene Fro sünd in en Gruft ünner de Kark begraven worrn. As de Kark 1937 en ne’e Heizung kregen hett, is de Gruft apenmaakt worrn un de Mumien von de dor begraven Personen sünd op’n Karkhoff nee begraven worrn. De Sarkschild von Elisabeth Margaretha un en tweten Sarkschild mit dat Wapen von de Familie von Cronhelm sünd denn bi Willi Meyne op’n Böhn lannt. 2009 hebbt de ne’en Besitters von Meyne sien Huus de Schiller von’n Böhn dalhaalt un an dat Helms-Museum in Horborg geven.