Ernst Röver

Friedrich Wilhelm Ernst Röver (* 3. September 1857 in Meyerhoff; † 22. März 1923 in Hausneindorf) weer en düütschen Örgelboer.

Röver is 1857 in Meyerhoff as Söhn von Johann Hinrich Röver boren, de to de Tied in Meyerhoff sien Warksteed harr. Ernst Röver sien Broder Carl Johann Heinrich Röver, de 1851 boren is, weer ok Örgelboer. 1863 is de Familie na Stood trocken. As Emil Reubke, Söhn von Adolf Reubke, 1884 doodblieven dee, hett Röver de Firma in Hausneindorf von em övernahmen. De Firma dee good lopen bet to Röver sien Rohstand 1921 un hett denn dichtmaakt. De gröttste Örgel, de Röver boot hett, weer mit dree Manuals un 101 Registers de för de Nikolaikark in Hamborg von 1891, de 1943 in’n Tweten Weltkrieg tweibummt worrn is. Ok de annere grote Örgel mit över 100 Registers in’n Doom Meideborg is nich dör’n Krieg kamen. Röver weer interesseert, den Örgelbo wieder uttowickeln un hett Experimenten maakt, de Örgeln technisch to verbetern. Op disse Wies hett he en ne’e Transmissionsvörrichtung, ene Registerklaviatur, en pneumaatsche Kombinationsinrichtung un en Kassenlaad op Grundlaag von de Röhrenpneumatik utklamüsert. Charakteristisch för sien Warken is de hoge Tall an Grundstimmen un dat he sik op dree Manuals beschränkt.

List von sien Örgeln (Utwahl)

Johr	Oort	Kark	Bild	Manuals	Registers	Anmarkungen
1888	Queddelnborg	St. Benedikti		II/P	30	to’n groten Deel noch vörhannen
1891	Hamborg	Nikolaikark		III/P	101	an’n 28. Juli 1943 sünd Kark un Örgel tweibummt worrn
1889–92	Lee	Nicolai-Kark		II/P	20	Pneumaatsche Örgel; noch meist kumplett vörhannen
1892	Leipzig	Johanniskark		III/P	53	nich mehr vörhannen
1895	Berlin	Kaiser-Friedrich-Gedächtniskark		III/P	51	1929 utwesselt; nich mehr vörhannen
1901	Halverstidde	Doom Halverstidde				Neebo achter’n Prospekt von Herbst; blots Delen noch vörhannen
1902	Halverstidde	Martinikark		III/P	44	Toeerst för de Stadthall Barmen; siet 1921 in St. Martini achter’n Prospekt von de Gröninger Örgel von David Beck (1596); hett 1945 swore Schadens afkregen
1903	Ditfurt	St. Bonifatius		II/P	33	kumplett noch vörhannen
1905	Queddelnborg	St. Blasii		II/P	30	Pneumaatsche Kassenlaad; meist kumplett noch vörhannen
1906	Meideborg	Doom Meideborg		III/P	100	An’n 17. Februar 1945 tweibummt
1907	Ascherslebbe	St. Stephanikark		III/P	52	Piepen 1940–44 von Palandt & Sohnle utwesselt
1907	Loomst	Bartelmees-Kark		II/P	28	För en Örgel von Arp Snitger (II/P/21) nee kamen. Nadem 1948 de Halvdeel von de Röver-Registers wegkamen sünd, hett Kemper de pneumaatsche Örgel 1955 in een mit mechaansche Traktur ümboot.
1908	Daaden	Kark Daaden		II/P	30	Pneumaatsche Örgel; noch vörhannen

Literatur

• Hermann Fischer: 100 Jahre Bund Deutscher Orgelbaumeister. Orgelbau-Fachverlag, Lauffen 1991, ISBN 3-921848-18-0.
• Alexandra Skiebe: Ernst Röver. Ein Orgelbauer aus Stade. Orgelakademie Stade e.V., Stade 2008, ISBN 978-3-931879-40-2 (Schriften der Orgelakademie Stade, Bd. 3).
• Julius Faulwasser: Die St. Nicolaikirche in Hamburg. Hamburg 1926, Kap. 13, S. 134–143.

Weblenken

• Biografie von Röver in dat Meideborger Biograafsche Lexikon (hoochdüütsch)
• Biografie von Röver bi Orgelbau Hüfken (hoochdüütsch)
• Biografie ünner orgel-information.de (hoochdüütsch)