Ernst Voß (Spoorkassendirekter)

Ernst Voß († 1892 in Hoboken) weer en düütschen Spoorkassendirekter un Bedreger.

Voß keem ut Hannover, weer toeerst Stüürinnehmer in dat Amt Veern un denn von 1872 bet 1884 Direkter von de Amtsspoorkass Veern. He hett as Direkter mit Hüüs un Grundstücken in de Stadt Hannover spekuleert. As de Geschäften nich good lepen, hett he Geller von de Spoorkass ünnerslahn un för 2,7 Millionen Mark veer Riddergöder köfft, de he utboon un mit Gewinn wedder verköpen wull. Dat weren Good Blomendal (bi Meideborg), Good Kladow un de Rönkenhoff (in Mekelborg) un Good Löhrstörp (in Holsteen). Löhrstörp hett Voß 1877 för 1,77 Millionen Mark von’n Vörmund von Wilhelm Georg Richard Schwerdtfeger köfft.

Von siene Plään, de Göder mit Gewinn wedder to verköpen un de ünnerslagen Geller wedder trügg to betahlen, is nix von worrn. In’n Dezember 1884 is de Dörstekeree opflagen. Blots dat Good Löhrstörp in Holsteen kunn de Spoorkass 18 Johr later mit 400.000 Mark Gewinn verköpen.

Nadem dat opflagen is, hebbt Dokters bi Voß Gröttenwahn diagnostizeert un he keem in de Heilanstalt Hilmssen. Ut de Anstalt is he utneiht un 1885 in de USA gahn. Dor hett he leevt, bet he 1892 dood in sien Wahnung in Hoboken funnen worrn is.

De Fall hett 1887 dorto föhrt, dat sik de Hannöversche Spoorkassenverband grünnt hett. De Verband hett ünner annern regelmäßige Kassenrevisionen inföhrt.

In de Gemenen von dat Amt Veern müssen de Grundstücksbesitters von 1887 bet 1909 en Kreisümlaag betahlen, de den Verlust utglieken schull. Düsse Ümlaag hett de Volksmund „Voß-Stüür“ döfft.

Voß weer bi de Wahl 1879 to dat Prüüßsche Aforntenhuus Kannedaat för de Düütsch-Hannöversche Partei in’n Wahlkreis Hannover 35 (Veern). He kunn sik mit 30,7 % von de Stimmen aver nich gegen Georg Weidenhöfer dörsetten. Bi de Wahl 1882 weer he in’n sülven Wahlkreis noch wedder Kannedaat. Dütmaal hett he 34,6 % von de Stimmen kregen un hett wedder gegen Weidenhöfer verloren.