European Aeronautic Defence and Space Company

De European Aeronautic Defence and Space Company (EADS) is dat gröttste Unnernehmen in de Luft-, Ruumfohrt- un Rüstungsindustrie in Europa. In dat Johr 2008 hett EADS 43,3 Milliarden € umsett' un is dor, na Boeing, dat tweet gröttste Unnernehmen in Luft- un Ruumfohrt in de ganze Welt mit. An mehr as 70 Stäen in Europa weert de Produkte vun dat Unnernehmen utdacht, vöranbröcht un produzeert. Bovenhen gifft dat noch 35 Butenkantore allerwegens in de Welt. Alltohopen hett dat Unnernehmen in de ganze Welt bi 118.349 Mitarbeiders (2008).

Dat Unnernehmen is an'n 10. Juli 2000 grünnt wurrn. Dormols sünd de düütsche DASA (DaimlerChrysler Aerospace AG), de franzöösche Aérospatiale-Matra un de spaansche Construcciones Aeronáuticas S.A. (CASA) tohopensmeten wurrn. De düütsche Zentrale vun den Konzern, de EADS Deutschland GmbH, sitt in Ottobrunn bi München.

Alleenigen Baas vun den Konzern is vun Juli 2007 af an de Franzoos Louis Gallois.

Geschichte

Siet sien Grünnen in't Johr 2000 is EADS to'n gröttsten Konzern in de Luft- un Ruumfohrt in Europa wurrn. De Andeele vun de Aktien weern bi de Grünnen vun de Firma so verdeelt:

• 34,5 % vun de Aktien sünd an de Börsen utgeven wurrn un unner allerhand verschedene Egner verdeelt.
• 30 % höllt de Daimler AG.
• 30 % hoolt de Lagardère-Gruppe (15 %) un de Franzöösche Staat (15 %).
• 5,5 % höllt de spaansche SEPI.

In datsülvige Johr hefft de Düütsche Rainer Hertrich un de Franzose Philippe Camus de Stäen as Vörsitters (Chief Executive Officers) övernahmen. Twuschen de Egner vun Andeele vun Airbus hett dat avers Striet geven un so is de britsche BAE Systems dor vun afspleten wurrn. So keem dat dorhen, dat Airbus to 80 % to EADS tohöörn deit, man de lesten 20 % sünd bi BAE Systems bleven. Vundeswegen hett Airbus den Unnertitel kregen: „an EADS joint venture with BAE SYSTEMS“ (up Platt: „En gemeensom Unnernehmen vun EADS un BAE SYSTEMS“). In dat Johr 2001 versöcht EADS jummerlos, nee Joint Ventures (gemeensome Unnernehmen) to grünnen. So kümmt de „ET Marinesysteme“ in Willemshaven tostanne. Se höört to 50 v% to EADS un to 50 % to de nedderlannsche Thales Group. Tohopen boot se Systeme för den Seekrieg. EADS hoopt, datt se dor en neen Markt mit upmaken kann. Ok MBDA is en Joint Venture ut verscheden Unnernehmen, as EADS Aerospatiale Matra Missiles, Matra BAE Dynamics un Alenia Marconi Systems. MBDA is en Rüstungsunnernehmen un befaat si mit dat Boen vun Stüer-Fleegwapen (Raketen, de stüert weern könnt), de unner annern för den Eurofighter EF 2000, de Dassault Rafale un de Saab JAS-39 Gripen herstellt weert. Ok in dat Johr 2001 warrt de EADS Aeroframe Services LLC grünnt. Dat is en Joint Venture twuschen EADS (81 %) un Northrop Grumman (19 %). Se is tostännig för de Pleeg vun all Airbus-Flegers, de in Noord- un Süüdamerika unnerwegens sünd. Nadem de poolsche Regeerung beslaten hett, de Strietkräfte vun Polen schollen mit EADS-Produkten up Schick brocht weern (unner annern dör de CASA C 295), köfft de EADS 85 % vun dat Aktienkapital vun „PZL Warszawa Okecie“ un boot dat Unnernehmen nu heel un deel in EADS in. In düsse Tied kann EADS gegen de amerikaanschen Konkurrenten goot mithollen, sunnerlich, weil de Airbus A 380, de A400M un de Eurocopter Tiger veel in Updrag geven weert.

Nu geiht dat los mit den Bo vun den gröttsten Passagierfleger vun de Welt, den Airbus A380. Allerhand nee Fleger weert vörstellt un fleegt to’n eersten Mol (A318, EC 145, Eurocopter Tiger un Eurofighter Typhoon). De EU beslutt, datt nu ok en egen Satellitennavigatschoonssystem boot weern schall. Dat kriggt den Naam Galileo.

2002 warrt noch mol mehr Geld umsett, sunnerlich in den militäärschen Sektor un bi de Tosamenarbeit mit de USA. To’n eersten Mol kann EADS den wichtigsten Mitstrieder Boeing Marktandeele afjagen up dat Feld vun de Billigflegers. Airbus verköfft 120 Airbus A319 an easyJet. Vun BAE SYSTEMS weert nu de Restandeele an Astrium un Paradigm afköfft un so hett EADS dat Leit bi düsse Firmen endgüllig in de Hand. To’n eersten Mol warrt EADS in’n düütschen MDAX-Aktienindex hannelt. Vunwegen datt de Firma jummers grötter wurrn is un jummers nee Feller dorto kamen sünd, mutt nu umboot weern: Nu gifft dat 5 Geschäftsfeller, de „Divischonen“ nömmt weert. Een vun jem is de EADS Defence and Security Systems. Se schall de Feller tohopenfaten, wo dat Unnernehmen för dat Militär togange is. So kaamt de Feller Military Aircraft, Defence Electronics, Defense and Communications Systems, Missiles un Services dor to. Bovenhen warrt dat Unnernehmen in dat Johr 2003 sunnerlich in de USA un in Russland grötter. Ok de EADS-Dochter Airbus kümmt goot vöran. To’n eersten Mol verköfft Airbus mehr zivile Fleger, as de wichtigste Konkurrent Boeing.

De Eurofighter Typhoon

Global wasst EADS wieter, as EADS Russland grünnt warrt. Dat is dat eerste Zentrum för de Konstruktschoon vun Airbus buten de Grünnerlänner vun EADS. An’t Enne vun’t Johr besluut EADS un BAE SYSTEMS, datt se nu den A350 up’n Markt bringen wüllt. Möögliche Kunnen quääst dor över rum un meent: Dor weer nich alltoveel nee gegen dat Modell vun de Konkurrenz, de Boeing 787 Dreamliner över.

De Airbus A380

In dat Johr 2005 speelt sunnerlich de Airbus A380 en grote Rull. he warrt nu vorstellt. Man ok de Eurofighter Typhoon warrt to’n eersten fix un feerdig Mol an de Kunnen utlevert. In den Vörstand gifft dat in düsse Tied Theater un so weert Thomas Enders un Noël Forgeard beide Präsidenten vun EADS. De een hett just so veel to seggen, as de annere. Gustav Humbert kümmt an de Spitz vun Airbus. Dor kaamt nu ok twee Chief Operating Officers to, tostännig för Strategie, Internatschonal geschäft un Finanzen. Dat sünd de Franzoos Jean-Paul Gut un de Düütsche Hans-Peter Ring.

As Forgeard Bott gifft, warrt Louis Gallois sien Nafolger. He weer vördem Baas bi de franzöösche Iesenbahn-Sellschop SNCF ween. To desülvige Tied hett Humbert Bott geven as Baas vun Airbus. Sien Nafolger is Christian Streiff wurrn.

In’n August hett EADS en groten Updrag kregen över 3 bit 4 Milliarden € för en nee, digital Polizeifunk-Nett för Düütschland. Düt Nett mit den Naam TETRA is tosamen mit Siemens upboot wurrn. 2006 hett BAE SYSTEMS för 2,75 Milliarden € sien Andeel vun 20 % an Airbus an de EADS verköfft. Vun dor af an is EADS de Alleenegner vun Airbus ween. Ok in’n August 2006 hett de russische Bank för den Butenhannel WTB (fröher Wneschtorgbank) 5,02 % vun de EADS-Aktien köfft. Düsse Bank höört den Staat Russland. De Aktien hefft um un bi 781 Millionen € köst. Dat warrt annahmen, dat Russland mitsnacken will bi de Geschäfte vun EADS. In’n Oktober hefft Vertreders vun de WTB-Bank seggt, se harrn den Andeel nu up sess bit seven Prozent hooch bröcht. Dat duer man bloß dree Maande, dor hett Christian Streiff as Baas vun Airbus in’n Oktober 2006 Bott geven un Louis Gallois hett sien Amt, tosätzlich to siene Arbeit bi EADS mit övernahmen..

2006 winnt de EADS mit de UH-72 Lakota, de vun de Dochter Eurocopter boot wurrn is, to’n eersten Mol en Wettstriet üm en wichtigen Updrag för de US-Armee. De will 322 Heevschruvers kopen.

In’n Juli 2007 köfft Dubai International Capital (DIC) en Andeel vun 3,12 % vun de EADS-Aktien.

Na de Airbus-Krise warrt an’n 16. Juli 2007 beslaten, datt de Dubbelspitz bi EADS afschafft weern schall. Alleenigen Baas warrt nu Louis Gallois. Thomas Enders geiht an de Spitz vun Airbus. Vunwegen datt de Macht twuschen Düütsche un Franzosen in den Konzern liek ween schall, warrt de Düütsche Rüdiger Grube Vörsitter vun den Verwaltungsraat.

In’n März 2008 hett EADS as Partner vun Northrop Grumman to’n eersten Mol en groten Updrag för de US-Luftmacht kregen. Dor güng dat üm den Bo vun 179 Tankflegers vun de Typ KC-45A bi, de up de Grundlaag vun de A330 boot warrt. Man an’n 10. September 2008 hett de US-Minister för Verdeffenderen verklaart, ut düssen Updrag, dor konn nix vun weern. In de USA harr dat vördem bannig Schandaal geven, datt de Boeing KC-767 den Updrag nich kregen harr. Amenne hett de US-Regeerung düütlich maakt, bi de Utschrievung harr dat Masse Fehlers geven un dat möss nu allens noch mol maakt weern. Vunwegen datt kloor weer, datt de US-Regeerung de EADS-Northrop Grummann-Updrag nich woll, hefft de Europäers denn keen ne’et Bott mehr afgeven. Anfang Juli 2009 hett de Afdeelung “Defence-&-Security” vun EADS en Verdrag mit Saudi-Arabien afslaten. Dor weer 13 Johre över verhannelt wurrn. Dor güng dat um en System to dat Afschotten vun 9.000 km Saudische Grenz bi. Dat is dat mit Afstand gröttste Projekt vun düsse Aart up de ganze Welt.

Wie EADS ehre Geschäftstwiege updeelt hett

Airbus

Airbus is de gröttste Unnerdeel vun EADS. Hier weert Passagierflegers boot vun den lüttjesten Airbus A318 bit to den gröttsten Airbus A380. Düsse Fleger, de an'n 15. Oktober 2007 in Toulouse dat eerste Mol utlevert wurrn is (an Singapore Airlines), is de gröttste Passageerfleger vun de Welt. An un for sik bringt Airbus in dat EADS-Unnernehmen den gröttsten Winnst up, man in dat Johr 2006 hett dat, vunwegen Problemen mit de A380, to'n eersten Mol en Verlust geven.

Defence & Security

UCAV Barracuda

Airbus A400M

Dat Unnenehmen schrifft up EADS-Nett sülms: „De Defences & Security Division umfaat in ehre Afdeelung Lenkwapen de MBDA mit ehren düütsche Aflegger LFK-Lenkflugkörpersysteme. Dat is de gröttste Hersteller vun Lenkflegers up de Welt. In jüngste Tied is dor de Business Unit Military Air Systems tokamen. Se hett den gröttsten Andeel an dat Eurofighter-Programm. Bovenhen gifft dat Elektronik för Verdeffenderen, de ganz vörweg is un ok Sekerheits-Kommunikatschoonssysteme för zivilen un militäärschen Bruuk. De Business Unit Services övernehmt Deenstleisten för Unnerhollt un Pleeg, wenn Eenheiten, de mit Militär- un Sekerheitsupgaven befaat sünd, düsse geern afgeven wüllt.“ (Zitat na www.eads.net) De Gesellschaft für Flugzieldarstellung as Dochter vun EADS övernümmt dat, dat de düütsche Bundswehr den Eernstfall utprobeern kann.

Eurocopter

Eurocopter EC135

Eurocopter is 1992 grünnt wurrn. Hüdigendags is dat en düütsch-franzöösch-spaansch Unnernehmen un en Geschäftstwieg vun de EADS. 2009 weer Eurocopter in de ganze Welt mit en Andeel vun 52 % de Nummer Een up den Markt för Heevschruvers för zivilen un halfstaatlichen Bruuk. Dor sünd 4,6 Milliarden € bi umsett' wurrn un Updräge över 344 ne’e Heevschruvers bi inhoolt wurrn. All tohopenrekent hefft de Produkte vun düsse Grupp en Andeel vun 30 % vun all Heevschruvers, de dat up de Eer gifft. In fiev Eerddeele gifft dat 18 Dochterunnernehmen. Bi de Eurocopter-Grupp arbeit alltohopen um un bi 15.600 Lüde.

Airbus Military

In dat Johr 2009 is de Geschäftstwieg Airbus Military nee grünnt wurrn. Dor weert Spezialflegers boot, as dat Tank- oder Transportflegers för dat Militäär sünd. Ok Upklärers, de wiet över de See hen unnerwegens sünd, höört dor mit to. Flegers, de in'n Momang in't Programm staht, sünd C-212, CN-235 un C-295, de poolsche „EADS PZL“ un dat MRTT-Programm (Mehr-Rullen-Transport-Tankers) mit de Versionen A310 MRTT un A330 MRTT un den taktischen Militärtransporter A400M.

Astrium

Ariane 44LP

Dat Dochterunnernehmen EADS Astrium befaat sik mit de Ruumfohrt. Dat is noch nich lang her, dor weer de Naam EADS SPACE. In düssen geschäftstwieg gifft dat bi 11.000 Mitarbeiders un de Umsatz hett in dat Johr 2006 bi 3,2 Milliarden € legen.