Fajã de Água

Fajã de Água is en Oort in’n Noordwesten vun dat Eiland Brava in de Republiek Kap Verde.

Dat Dörp Fajã de Água

Geografie

Dat Daal Fajã de Água

Emigrantendenkmol.

Kark.

Dat Fischerdörp liggt in en Bucht an’n Atlantik un is ümgeven vun piele Bargen, dör de dat Daal Ribeira do Fajã de Água föhrt. Dat Daal fangt in en Hööch vun ruchweg 450 m an, woneem en Even mit eenige Buernhöff liggt. Dör dat Daal verlöpt en lütten Stroom, de in’n Oort in’n Atlantik inmünnt. Dat Land is dorüm teemlich fuchtig un tellt mit to de fruchtborsten Ecken vun’t Eiland. Dor warrt Kokospalmen, Suckerrohr, Bananen un anner’t Grööntüüch anboet.

Dat Fischerdörp sülvst besteiht an sik blots ut en Reeg vun Hüüs an de Küst. De lütte Strandstriepen bargt teemlich veel Stenen un kann dorüm to’n Baden nich goot bruukt warrn. Gliek to’n Anfang vun’t Dörp steiht en smucke lütte Kark mit en schaddigen Park gegenöver.

Historie

Fajã de Água harr fröher mol en grote Bedüden för’t Eiland. Bit 1843 weer dat de Hööfthaven vun Brava. In’t 18. un 19. Johrhunnert hebbt de amerikaanschen Walfangers mit jemehr Scheep hier in de Bucht vör Anker legen, üm sik mit Water un wat to Eten to versorgen. Butendem weer hier ok Mannschop an Boord nahmen. Vele Inwahners vun Brava sünd op dissen Weg in de Emigratschoon gahn, vun wegen, dat de Lüüd op Brava bannig arm weern, un över de Walfangers een Mööglichkeit sehn, ut jemehr Laag ruttokamen.

In den Park steiht dat Emigrantendenkmol, dat 1993 ut Basalt maakt worrn is. Dat schall an dat Seilschipp Matilde denken helpen, dat 1943 ünnergahn is un eenunföfftig Mannslüüd mit sik nahmen hett. Bi dat Unglück hett meist jede Familie op Brava en Anhöörigen verloren. Dat Unglück is ok Thema vun dat Morna-Leed „Valsa do Matilde“.

Flaaghaven

De Straat, de dör dat Daal in’n Oort föhrt, ennt ruchwg een Kilometer achter Fajã de Água an den vörmoligen Flaaghaven. De Straat dorhen to boen is nich licht wesen vun wegen de pielen Bargen un Felsen. Boet worrn sünd de Straat un de Flaaghaven vun de mehrstendeels arbeitlosen Inwahners, de mit Geller ut Düütschland in’n Rahmen vun en Entwicklungshelp betahlt worrn sünd.

De Flaaghaven is 1992 inweiht worrn un weer för de Lüüd op Brava mit’n grote Hapen verbunnen, wat de Anbinnen an de annern Eilannen un ok de Versorgen mit Göder bedrapen de. Man, in de Küst weiht faken en düchtig starken unberekenboren Wind, de dat Afflegen un Lannen so gefährlich maakt, dat de Flaagsellschopp TACV den Bedrief in de Twüschentiet wedder instellt hett.