Brava (Kap Verde)

Brava (port.: „wild“, „nich tähmbor“) is en Eiland in’n Atlantik un höört to de negen bewahnten Eilannen vun de Republiek Kap Verde. Dat Eiland is meist kreisrund un is dat lüttste vun de bewahnten Eilannen vun de Republiek.

Geografie

De Hööftstadt vun Brava: Vila Nova Sintra

Dat lütte Eiland Brava tellt to de Ilhas do Sotavento un liggt dor ganz in’n Westen. Mit blots 64 m² is Brava dat lüttste vun de bewahnten Eilannen vun Kap Verde un hett en Dörmeter twüschen negen un ölven Kilometer. Mit ruchweg 980 m is de Fontaínhas de hööchste Barg, so dat Brava jüst man so even hooch noog is, üm ut de Passatwulken Nedderslag aftokriegen. Na'n Oosten hen liggt dat Eiland Fogo in’n Afstand vun üm un bi 20 km. Wieldat Fogo mit sien hogen Vulkan, den Pico de Fogo, aver sotoseggen Windschatten geven deit, warrt Brava faken vun de Lee-Wulken överdeckt. Dordör verdunst nich so veel vun de Fuchtigkeit un de Vegetatschoon blifft dordör wat rieker.

Tostannen kamen is Brava jüst so as de annern kapverdschen Eilannen dör Vulkanismus, man utbroken is dor nu al siet lange Tiet nix mehr. Dat mutt aver nich heten, dat de Gegend nich mehr aktiv is. Vun de Küst geiht dat Eiland gau in de Hööch. In de högeren Lagen is dat Eiland wat dichter besiedelt. De Hööftstadt is Vila Nova Sintra mit ruchweg 1900 Inwahners (Bereken: 2005). Op dat hele Eiland schüllt hüüt üm un bi 9.000 Minschen leven, bi de letzte Volkstellen 2000 weern dat noch ungefähr 6.800 Lüüd. De Stadt wiest sik teemlich bunt dör de veelen Blomen, de hier wassen doot.

Dat Havendörp Furna hett dör den Fährbedriev na buten grote Bedüden för Brava

En bannig wichtigen Oort is vör Brava dat Fischerdörp Furna, dat mit’n Auto ungefähr ’n Veerdel Stünn vun Nova Sintra weg 500 Meter deeper an de Küst liggt. Hier gifft dat en lütten Fähr- un Hannelshaven. De hüütige Fähranlegger is eerst 2000 fardig worrn. Hier lannt de Scheep an, de vun Fogo röver kamt, oder direkt vun de kapverdschen Hööftstadt Praia. Op de anner’n Siet vun’t Eiland leegt de Bucht un dat lieknöömte Fischerdörp Fajã de Água, de to sünnere Tieten in’t Johr ok as Haven anlopen warrn kann.

Dicht bi is an de Bucht in mehrjohrige Arbeit en vun Düütschland finanzeerten Flaaghaven boot worrn, ofschoonst dör den gresigen Wind dat Anflegen dor bannig swor is. En vergliekboren Flaaghaven mit de lieken Windümstännen is ok op dat Eiland Santo Antão boot worrn. Dor hett dat denn aver en Daags en sworen Unfall geven, as en Fleger lannen wull. Dorna sünd beid Flaaghavens dicht maakt worrn.

Ruchweg söss km vör de Küst vun Brava leegt de Ilhéus do Rombo, hier vun de Bargflank över Nova Sintra ut bekeken.

Liekermaten swor is dat aver ok, mit’n Schipp na Brava to kamen. De Dörfohrt twüschen Brava un Fogo is bekannt dorför, dat de See hier veel ruger is as annerswo in Kap Verde. Jüst ok mit de groten Fährschipp is dat dorüm ’n bannigen Opwand, in den lütten Haven vun Furna antoleggen. Sünners ok de gresige Wind hett Utslag geven för den Naam vun’t Eiland.

En geern besocht Teel liggt in’n Oosten vun’t Eiland ok nich wiet weg vun de Hööftstadt. Dat is de Fonte de Vinagre, wat översett „Etigborn“ heet. Dat is en Heelborn mit Water, dat veel Fluor un Bikarbonat bargt, so dat dat Water suer as Etig smeckt.^[1]

To Brava höört vun wegen de Verwalten ok de Ilhéus do Rombo, de nich bewahnt sünd, aver vun wegen jemehr deelwies teemlich feinen Sandstrännen jümmer fakener ok vun Touristen besocht warrt, de sik vun Furna ut privat översetten laat.

Historie

Dat Eiland Brava is in’t Johr 1462 vun de Portugeesen to’n eersten mol besocht worrn, man dat hett noch bit 1573 duert, bit sik de eersten Siedlers dor daallaten hebbt. De Hööchpunkt vun’n Hannel mit Slaven in de Stadt Cidade Velha weer to den Tietpunkt al överschreden, so dat sik de Lüttbuerns ut Madeira un den Minho (Noord-Portugal) doran nich mehr bedeeligt hebbt. 1680 keem dat op dat Navereiland Fogo to’n Utbreken vun den Vulkan. To sünd veele Inwahners vun Fogo vör de Lavaströöm weglopen un hebbt sik duersom op Brava daallaten.

In’t 17. un 18. Johrhunnert legen faken Piratenscheep in de Buchten vun Brava, de denn aver in’t fröhe 19. Johrhunnert vun de Walfisch-Fangscheep ut Europa un de USA aflöst worrn sünd. De noch ünner Segels fohrenden Walfangers ut de USA hebbt junge Kerls ut Brava anhüert, wat de Anfang weer vun’t meist tweehunnert Johr anhollend Utwannern na Oosten, sünners an de olen Walfanghavens Boston, Providence un New Bedford.

Beropen worrn is Brava dör den Musiker Eugene Tavares, de mit siene trurigen Mornas, de he in Kapverdisch Kreol schreven hett, to’n eersten mol sülvstbewusst kapverdische Musik schapt hett.

Weertschap un Tourismus

Dat eenzig, wat dat op Brava an Produkschoon geven deit, sünd handwarklich Fischeree un ’n beten [[Bueree], de över Bewatern in’n Gang hollen warrn kann. Hannel, Gewarf un private Huusholten leeft tomeist vun Innahmen ut de Emigratschoon in de USA.

Op Brava gifft dat upstunns noch so goot as keen Tourismus, wieldat de Flaaghaven nich mehr in Bedriev is un de Fährverbinnen ok eerst siet 2004 ’n beten wat regelmatiger – aver jümmer noch teemlich roor – sünd. De wenigen Minschen, de dat Eiland besöken doot, kamt vör allen to’n Wannern un möögt dat beten wat eensomere un torüchtogene vun Brava. För den Massentourismus is Brava nich egent alleen al dor siene Landschap. Wokeen na Brava kamen will, oder sik de lütteren Eilannen vun de Ilhéus do Rombo nakieken will, is mitünner op private Fahrten mit Fischers anwiest, as de normale Fähr blots eenmol in de Week föhrt.

Borns

↑ Kapverdische Inseln, Dumont Reisetaschenbuch, 3. Oplaag, 2007, ISBN 978-3-7701-5968-0

Koordinaten:14° 51′ N, 24° 42′ W

Eilannen vun Kap Verde

[dumont-1] Kapverdische Inseln, Dumont Reisetaschenbuch, 3. Oplaag, 2007, ISBN 978-3-7701-5968-0

[1]