Fatih Akın
Fatih Akın (* 25. August 1973 in Hamborg) is en düütschen Filmspeelbaas, Dreihbookschriever, Schauspeler un Filmproduzent mit töörksche Afstammen.
Leven un Loopbahn
ännernFatih Akın is en Söhn vun töörksche Inwannerers. Sien Vadder Enver stmmt ut de Provinz Trabzon un keem 1966 na Düütschland. Sien Mudder keem dree Johren later na. Boren un opwossen is Akın in Hamborg-Altno, woneem he op dat Gymnasium Allee güng.
Tietwies weer Akın Liddmaat in en Jöögdbande[1]. Al in sien Schooltiet hett he Kortgeschichten un korte Dreihböker schreven. Mit en Super-8-Kamera ünnernöhm he eerste Versöken mit de Filmeree un weer later denn Liddmaat bi en Off-Theatergrupp an’t Hambörger Thalia Theater.
In’t Johr 1993 füng Akın as Uthülp vör un achter de Filmkulissen bi de Wüste Filmproduktion vun de Hambörger Produzenten Stefan Schubert un Ralph Schwingel an. BUtendem arbeit he jümmer mehr ok as Schriever, Speelbaas un Schauspeler. Na sien Abitur hett he vun 1994 bit 2000 dat Studium Visuelle Kommunikatschoon an de Hoochschool för billen Künst Hamborg (HfbK) afsloten. Ut sien Tosamenarbeit mit Schwingel kemen de Kortfilmen Sensin (1995) un Getürkt (1996) tostannen. As Speelfilmspeelbaas füng he 1998 mit Kurz und schmerzlos an, dorna kemee Im Juli. (2000) un Solino (2002), in de he jeedmol Moritz Bleibtreu as Hööftdorsteller harr.
Tosamen mit Andreas Thiel un Klaus Maeck grünn Akın 2004 de Produkschoonsfirma corazón international. In’t sülve Johr hett he den Film Gegen die Wand dreiht, den eersten Deel vun en plaante Trilogie över de Leef, den Dood un den Düvel. För den Film is he bi de Berlinale 2004 uttekent worrn as ok mit den Düütschen Filmpries un den Europääschen Filmpries. Bito verfilm he dat Leed Die alten bösen Lieder vun Heinrich Heine as düütschen Bidrag för den Film Europäische Visionen vun Lars von Trier. 2005 weer Akın in de Jury vun de Filmfestspelen vun Cannes inlaadt.
In’t Wintersemester 2005/06 kreeg Akın en Lehropdrag an de Hoochschool för billen Künst Hamborg[2]. Dat glieke Johr hett he sien eersten langen Dokumentarfilm Crossing The Bridge – The Sound of Istanbul, in de he över de velen verschedenen Musikrichten vun Istanbul berichten de. 2007 weer he Liddmaat vun de Fre’e Akademie vun de Künsten in Hamborg. In dat glieke Johr hett Akın mit Auf der anderen Seite den tweeten Deel vun sien „Leef, Dood un Düvel“-Trilogie rutbröcht. Dat Drama harr sien Premiere in Cannes.
As he an Auf der anderen Seite arbeithett, füng Akın mit en dokumentaarsch Langtietprojekt an ünner den Titel Müll im Garten Eden. Dorbi geiht dat üm en plaante Mülldeponie in Çamburnu, woneem sien Grootöllern herkamt. De Film weer 2012 in Cannes bi en Sünnervörstellung to’n eertsen mol wiest[3].
Akın wahnt in Hamborg-Ottensen un is verheiraat mit de Düütsch-Mexikanerscher Monique Akın, mit de he twee Kinner hett[4]. Siet 2009 ünnerstütt Akın mit annere Frünnen den Verein Soul kids[5]. Wegen de Polizeigewalt un de Medienzensur in de Republiek Törkie bi de Protesten in de Törkie 2013 schreev Akın en apenen Breef an den töörkschen Staatspräsident Gül[6] un hett en Initiatiev vun Kulturmakers ünnerstütt, de sik an Angela Merkel un annere europääsche Politikers wennen de, dat se sik för en Enn vun de Gewalt gegen de töörkschen Inwahners insetten schülln[7].
Filmografie (Utwahl)
ännern| Johr | Titel | Funkschoon |
|---|---|---|
| 1995 | Sensin – Du bist es!, Kortfilm | Dreihbook Speelbaas Dorsteller |
| 1996 | Getürkt, Kortfilm | Dreihbook Speelbaas Dorsteller |
| 1997 | Trickser, Feernsehn | Dorsteller |
| 1998 | Kurz und schmerzlos | Dreihbook Speelbaas Dorsteller |
| 2000 | Im Juli. | Dreihbook Speelbaas Dorsteller |
| 2001 | Planet der Kannibalen | Dorsteller |
| 2001 | Denk ich an Deutschland – Wir haben vergessen zurückzukehren, Dokumentatschoon | Speelbaas |
| 2002 | Solino | Speelbaas |
| 2004 | Gegen die Wand | Dreihbook Speelbaas Produzent |
| 2004 | Visions of Europe dt.: Europäische Visionen |
Dreihbook Speelbaas Produzent |
| 2004 | Kebab Connection | Dreihbook |
| 2005 | Crossing the Bridge: The Sound of Istanbul, Dokumentatschoon | Dreihbook Speelbaas Produzent |
| 2005 | Hirsiz var! dt.. Diebstahl alla turca |
Dorsteller |
| 2007 | Auf der anderen Seite | Dreihbook Speelbaas Produzent |
| 2008 | Chiko | Produzent |
| 2009 | Soul Kitchen | Dreihbook Speelbaas Produzent |
| 2012 | Der Müll im Garten Eden, Dokumentatschoon | Speelbaas Produzent |
| 2012 | Blutzbrüdaz | Produzent |
| 2014 | The Cut | Dreihbook Speelbaas Produzent |
| 2016 | Tschick | Speelbaas |
| 2017 | Aus dem Nichts | Dreihbook Speelbaas Produzent |
Utteken
ännern
Fatih Akın is för sien Wark bit hüüt (Stand April 2014) över föfftig mol för Filmpriesen vörslahn wesen, un weer mit mehr as dörtig dorvun uttekent. Ünner annern weer he uttkent mit:
- 1997: den Golden Plaque vun’t Chicago International Film Festival för Getürkt
- 1999: den Bayerisch Filmpries in de Kategorie Best Nee Speelbaas för Kurz und schmerzlos
- 2001: den Adolf-Grimme-Pries in de Kategorie Fiction/Ünnerhollen för Kurz und schmerzlos
- 2004: den Düütschen Filmpries in de Kategorie Best Speelbaas för Gegen die Wand
- 2004: den Golden Boor vun de Internatschonale Filmfestspelen Berlin för Gegen die Wand
- 2005: den Bodil Award in de Kategorie Best Nich-amerikaansch Film för Gegen die Wand
- 2007: den Europääschen Filmpries in de Kategorie Best Dreihbook för Auf der anderen Seite
- 2007: den Pries för’t Beste Dreihbook bi de Internatschonale Filmfestspelen vun Cannes för Auf der anderen Seite
- 2008: den Bayerischen Filmpries in de Kategorie Best Speelbaas för Auf der anderen Seite
- 2008: den Düütschen Filmpries in de Kategorie Best Speelbaas för Auf der anderen Seite
- 2008: den Düütschen Filmpries in de Kategorie Best Dreihbook för Auf der anderen Seite
- 2011: den Ehrenpries vun’t Filmfestival Törkie/Düütschland
Publikatschoon
ännern- Soul Kitchen: Drehbuch von Fatih Akın , rutgeven vun Mette Hermann un Merete Vonsbaek, mit en Nawoort vun Oliver Möbert. Tyskforlaget, Däänmark, 2012, ISBN 87-90755-75-8; ISBN 978-8790755-751.
- Im Clinch. Die Geschichte meiner Filme. Rutgeven vun Volker Behrens un Michael Töteberg. Rowohlt, Reinbek 2011, ISBN 978-3-498-00669-3.
Kiek ok
ännernWeblenken
ännern
- Fatih Akın in de Internet Movie Database (engelsch)
- Literatur vun un över Fatih Akın in’n Katalog vun de Düütschen Natschonalbökeree
- Lange Bio- un Filmografie bi film-zeit.de
Borns
ännern- ↑ „Hexenkessel Hamburg-Altona“, Kultur Spiegel, 28. September 1998, L 10, S. 18
- ↑ „Fatih Akin wird Professor“, Artikel in’t Hamburger Abendblatt, 11. Oktober 2005
- ↑ Fatih Akin – unser Mann für Cannes bi abendblatt.de, 16. Mai 2012 (afropen an’n 17. Mai 2012).
- ↑ Raue, Patricia: Fatih Akin: Der Regisseur des Rauen wird 40, ndr.de vun’n 25. August 2013.
- ↑ Websteed soul kids e.V.
- ↑ Offener Brief Akıns an Staatspräsident Gül, Hamburger Abendblatt, 16. Juni 2013
- ↑ Offener Brief deutscher Kulturschaffender wegen Gewalt in Türkei, Die Zeit, 16. Juni 2013