Fettes Brot

Fettes Brot
Grünnt:	1992
Herkamen:	Düütschland
Aart vun Musik:	Hip-Hop/Rap
Website:	http://www.fettesbrot.de/
Wer maakt dor mit
MC:	Dokter Renz (Martin Vandreier)
MC:	König Boris (Boris Lauterbach)
MC:	Björn Beton (Björn Warns)
DJ:	DJ exel.Pauly (Markus Pauli)

Fettes Brot is en düütsche Hip-Hop-Grupp. De warrt as „Dinosaurier“ mank de Hip-Hop-Gruppen in Hamborg ankeken. Herkamen deit se aber ut Halstenbek, Schenefeld un Pinnbarg. Düsse Öörd liggt all in den Kreis Pinnbarg.

Geschicht

As sik 1992 de Grupp „Poets Of Peeze“ uplööst hett, dor grünnen de ehr Liddmaten Martin Schrader (*23. Juli 1974 in Hamborg) un Tobi Tobsen Schmidt tohopen mit Boris Lauterbach (*18. Juni 1974 in Hamborg), Björn Warns (*20. Mai 1973 in Pinnbarg) un „Mighty“ Schmidt de Band „Fettes Brot“. Tobi un Mighty Schmidt hefft de Band al fix wedder verlaten un anner Saken utprobeert.

Ökelnaams

Martin Schrader (hüdigendags Martin Vandreier) driggt ok de Ökelnaams „Dokter Renz“, „Rektor Donz“ un „Speedy Konsalik“. Boris Lauterbach sien Ökelnaams sünd „König Boris“, „Kay Bee Baby“, „Long Leg Lauterbach“, „Rock’n Roll Coseng“ un „Der Saufekanzler“. Björn Warns heet woll „Björn Beton“, „Das Ding der Unmöglichkeit“, „Flash Müller“ un besunners „Schiffmeister“ (wat en Dubbelsinn hett...)

Eerste Platten

De eerste egen Platt, de rutkeem, weer de EP „Mitschnacker“ up Yo Mama Records. De hefft se al as Trio sunner de Schmidt-Bröder rutbröcht. Al in dat Johr 1993 weern de Leeder „Schwarzbrot-Weißbrot“ un „Gewalt der Schule“ up den Sampler „Endzeit 93“ ut Sleswig-Holsteen vun dat Independent-Label Wilde Welt Records rutkamen.

Geld verdeenen konn de Band denn mit de Single „Nordisch By Nature“ un dat Album, wat dor denn tohören dö. Düt Leed is meist al to en Hymne wurrn. De Band weer dor bannig öberrascht vun, datt düt Leed so goot ankeem. Vunwegen, datt se bange weern, de Lüde müchen denken, de Band kann bloß man düssen enen Song, hefft se den nah en Paar Maanden vun’n Markt nahmen. Midderwielen weern de Brööd vun’e Technik her rieper wurrn un wiesen dat mit jem ehren eersten Longplayer „Auf einem Auge blöd“. Dor weern ganz verscheden Saken bi un de Ton leeg up de humorige Aart. Dat de dree Rapers Geschichten vertellt un sik dor binnen de Strophen bi afwesselt, kann een dormals al sehn.

Karrier

Dat duur man knapp een Johr, dor gell „Fettes Brot“ as en grode Nummer in de Länner, wo düütsch snackt warrt. Dat keem vunwegen dat tweede Leed, wat meist to en Hymne wurrn is. Dat weer „Jein““, en richtigen Ohrworm, de fragen dö „Soll ich’s wirklich machen oder laß ich’ s lieber sein?“. Dor nah keem dat Album „Außen Top Hits, innen Geschmack“. Ok de Singles vün düt Album keemen goot an. Dendemann (Dormols noch bi de „Arme Ritter“) harr siene eersten lüttjen Uptreed. Tohopen mit Max Herre, Blumentopf, Spax un Der Tobi das Bo hett de Band „Wildwechsel“ rutbröcht. Ünner annern weern de Brööd ok in’t Radio togange: Se bedreben een egen Sendung mit den Naam „Forellentee“ bi Radio Fritz.

Ruhiger Tieden

Twuschendör is dat en beten ruhiger worrn üm Fettes Brot. Man de dree Künstlers hefft nich eenfach Föfftein maakt, man de hefft ganz wat Neet utprobeert: En Hip-Hop-Band in en Höörspeel. 1998 weer dat, dor maken de Jungs in de Nummer 79 „Im Bann des Voodoo“ vun de Drei ??? mit. An’t Enn vun dat sülbige Johr mellen sik de Dree torüch mit de Single „Können diese Augen lügen?“. Anfang 1999 keem dat Album „Fettes Brot läßt grüßen“ rut. Dor höör düsse Single mit to. To’n eersten Mol versöch de Band dat ok mol mit Musik, de nich to’n Hip Hop torekent weern kann. Dat geev natüürlich allerhand Schandaal. En groden Hit, as bi de anner Alben weer dor dütmol nich mit bi, man „Viele Wege führen nach Rom“ un „Lieblingslied“ keemen doch ganz goot an. „Ruf mich an“ hett Fettes Brot den mit James Last tohopen maakt. Dat Leed keem 1999 rut. Denn weer eerstmol Roh. In düsse Tiet hett jem ehr DJ Rabauke de Band verlaten. Een Maand later is denn DJ exel.Pauly as neen DJ upnahmen wurrn. Fettes Brot hett denn de B-Sieden vun jem ehr Platten tohopenstellt un för sik rutbröcht, dorto Remixen un exklusiv Produktionen. Dat Ganze heet denn „Fettes Brot für die Welt“. De Beginner, Smudo vun Die Fantastischen Vier un De Tobi & Das Bo hefft dor bi mithulpen.

Eerst 2001 keem denn dat veerde richtig Album vun Fettes Brot herut. Dat gell as en lütten neen Anfang. Dat Album dreeg den Naam „Demotape“ un bröch en anner Aart vun Musik, as een dat bit dorhen vun de Band kennt hett. „Schwule Mädchen“ weer de gröttste Hit vun düt Album. Tohopen mit Skunk Funk hefft se aber to desülbige Tiet de pure Hip-Hop-Single „Fast 30“ vörstellt. Een Johr later, in de Harfsttiet 2002 keem al dat Greatest-Hits-Album „Amnesie“ rut. 2003 hefft se sik mit Rio Reiser sien Musik ut’neen sett un hefft sien Album „Ich bin müde“ ut dat Johr 1983 covert.

Comeback un egen Label

2004 hefft de Jungs jem ehr egen Label grünnt. Dat weer de „Fettes Brot Schallplatten GmbH“. 2005 seeg denn dat Album „Comeback“ mit dat Leed „Emanuela“. Bi den Bundesvision Song Contest keem de Band dor up den tweeden Platz mit. Bloß en paar Daag later keem de Single up’n Markt un kladder furts up’n drüdden Platz vun de Single-Charts. An’n 21. März 2005 wurr dat Album „Am Wasser gebaut“ vörstellt. Dat is bitherto dat Album vun düsse Band, wat an’n Besten ankamen is. Dor geev dat nich mehr so veel Rap, man de Musik glipp mehr nah’n Soul röber.

De tweede Single, de vun düt Album nahmen wurr, weer „An Tagen wie diesen“ (tohopen mit Pascal Finkenauer).

An’n 6. Oktober 2005 sünd de dree Rappers to’n eersten Mol – un denn glieks dubbelt- mit den Comet-Musikpries uttekent wurrn. As „Best Band“ un ok noch mit den „Besten Song“ („Emanuela“)

An’n 22. dezember 2005 hett Fettes Brot in de Color Line Arena in Hamborg vör mehr as 13.000 Tokiekers dat gröttste Kunzert in jem ehr Karrier geben. De TV-Senner MTV un allerhand Radio-Stationen hefft dat Kunzert live öberdragen.

Snack

Den Ökelnaam „Schiffmeister“ hett Björn Warns vun dat Computerspeel Pirates! vun hernahmen. Jummers, wenn dat en Upstand up’n Schipp geben konn, denn keem dor en Wohrschau: “Shipmaster warns“...Dat engelsche Woort Shipmaster hett he denn fix in’t Düütsche öbersett.
De Titel vun dat Album „Außen Top Hits- Innen Geschmack“ in vun de Freerbüdel- Werbung vun de Firma Melitta klaut.

Wat rutkamen is

Alben

1995: Auf einem Auge blöd
1996: Außen Top Hits, innen Geschmack
1998: Fettes Brot lässt grüßen
2000: Fettes Brot für die Welt (Tohopenstellt B-Sieten, roor Stücken, Saken, de noch nich rutkamen weern un dree nee Leeder)
2001: Demotape
2002: Amnesie (Tohopenstellt ut all Singles bit 2002 , bloß nich ut Gangsta Rap, vgl. DVDs)
2005: Am Wasser gebaut
2008: 'Strom und Drang'

EPs

1994: Mitschnacker'
1995: 'Auf einem Auge blöd'
1996: 'Außen Top Hits, innen Geschmack'
1998: 'Fettes Brot lässt grüßen'
2000: 'Fettes Brot für die Welt (Tohopenstellt B-Sieten, roor Stücken, Saken, de noch nich rutkamen weern un dree nee Leeder)'
2001: 'Demotape'
2002: 'Amnesie (Tohopenstellt ut all Singles bit 2002 , bloß nich ut Gangsta Rap, vgl. DVDs)'
2005: 'Am Wasser gebaut'

Singles

1994: Definition von Fett
1995: Männer
1995: Nordisch By Nature
1995: Gangsta Rap (bloß up Vinyl rutkamen)
1996: Jein
1996: Mal sehen
1997: Silberfische in meinem Bett
1997: Sekt oder Selters
1997: Lieblingslied
1998: Viele Wege führen nach Rom
1998: Können diese Augen lügen?
1999: Ruf mich an (mit James Last)
2000: Da draussen
2001: Schwule Mädchen
2001: Fast 30 (mit Skunk Funk)
2001: The Grosser
2002: Welthit
2003: Tanzverbot (Schill To Hell) (mit Bela B.)
2003: Ich bin müde (Cover vun den Song vun Wolfgang Michels un Rio Reiser)
2005: Emanuela
2005: An Tagen wie diesen (mit Pascal Finkenauer.)
2006: Soll das alles sein
2006: Fußball ist immer noch wichtig (mit Bela B., Marcus Wiebusch vun Kettcar un Carsten Friedrichs vun Superpunk)
2008: Bettina pack deine Brüste ein

DVDs

2002: Amnesie (Archiv-DVD mit Musikvideos un anner Tüüch plus CD mit all Singles bit 2002, bloß nich Gangsta Rap)

Priesen

ECHO 1996 as „Erfolgreichste deutsche Nachwuchsband“
Comet 2005 as „Beste Band“ un för den „Besten Song“ („Emanuela“)
GQ Man of the Year 2005 as „Beste Musiker“
Eins Live Krone 2005 för de „Beste Single“ („Emanuela“)
Goldene Schallplatte för „Am Wasser gebaut“ (Düütschland) und „Emanuela“ (Düütschland un Öösterriek)
Echo 2006 as besten „Hip-Hop/R&B national“ Act
Bravo Otto Gold 2006 as besten „Hip-Hop national“ Act

Törns

1995 – Klasse von '95-Tour – mit Main Concept, Massive Töne, ZM Jay, MC René, F.A.B., Der Tobi & Das Bo
1996 – Sven, Sven & Sven live – Inkognito-Club-Tour in’n November
1996/97 – Spiel mir das Lied vom Brot-Tour – mit Blumentopf, Massive Töne
1998 – Harte Tour '98 – mit Eins Zwo un DJ I.L.L. Will
2001 – Schlechtwetterfront-Tour – mit DJ exel.Pauly & Skunk Funk
2003 – Gute Laune Hölle-Tour (bloß in Theaters) – mit Die Herren
2003 – Jenseits der Grenze des Zumutbaren-Tour vun Die Ärzte mit Fettes Brot as Vörband
2005 – Am Wasser gebaut-Tour Part 1 – mit Pascal Finkenauer, Emel & J-Luv, Vörband: Fiva MC & DJ Radrum
2005 – Am Wasser gebaut-Tour Part 2 – mit Pascal Finkenauer, Emel & Patrick Gwada, keen Vörband

Weblinks

Offiziell Website
Offiziell Website to dat aktuell Album All Songs online to’n Hören.
Biographie bi laut.de