Franz Puttfarken
Franz Heinrich Wilhelm Puttfarken (* 30. Juli 1879 in Stiepelse; † 16. November 1936 in Hamborg) weer en düütschen Jurist.
Puttfarken is 1879 in Stiepelse boren.[1] He hett 1899 dat Abitur an dat Johanneum Lümborg maakt un denn Juristeree studeert.[2] 1907 is he Gerichtsassesser in Hannover worrn.[3] 1912 keem he as Amtsrichter an dat Amtsgericht Heydekrug un 1914/1915 weer he Soldaat in’n Eersten Weltkrieg.[3] Nadem he verwunnt worrn is, weer he denn wedder Amtsrichter in Heydekrug.[1] As dat Memelland mit Heydekrug an Litauen fullen is, is he 1920 as Rieksdüütschen ut dat Land utwiest worrn.[3] He is denn Richter an dat Landgericht Lümborg un Vörsitter von en Straafkamer worrn.[1][3] 1922 is he Landgerichtsraad worrn un 1923 Direkter an dat Landgericht Lümborg.[3] 1930 is he to’n Präsident von dat Landgericht opstegen.[1] In de Tied as Gerichtspräsident hett dat en Reeg Prozesse gegen Slägertrupps von de Natschonalsozialisten geven.[1] Nadem de Natschonalsozialisten 1933 denn de Macht övernahmen hebbt, hebbt se Puttfarken an’n 11. September 1933 ut sien Amt rutsmeten un sik op dat Gesett för dat Wedderherstellen von dat Beroopsbeamtendom beropen.[1]
He weer von 1925 bet 1929 Afornten för de Düütsche Volkspartei in’n Provinziallanddag Hannover.[1] 1928 bet 1933 weer he Maat in’n Republikaanschen Richterbund.[1]
