Friedrich Georg Wilhelm Ostermeyer
Friedrich Georg Wilhelm Ostermeyer (* 2. März 1760 in Diemarn; † 20. April 1824 in Veern) weer en düütschen Verwaltungsbeamten.
Ostermeyer is 1760 as Söhn von Marie Friederike Dorothea, borene Ostmann, un Johann Barthold Ostermeyer in Diemarn boren.
He hett sik an’n 2. Mai 1778 för en Studium von de Juristeree an de Universität Göttingen inschreven.[1] In Göttingen weer he ok Maat von de Hannöversche Landsmannschaft.[2] Nadem he to Michaelis 1781 mit dat Studium trech weer,is he in’n kurhannöverschen Verwaltungsdeenst gahn.[2][1] He is 1785 Amtsschriever in dat Amt Arzen worrn, 1786 in dat Amt Niestadt, 1789 in dat Amt Koldingen[3] un 1790 in dat Amt Veern.[1] Dor weer he toglieks ok Garnison-Auditör.[1][4] 1793 güng he as Amtsschriever in dat Amt Wessen, keem denn aver 1794 wedder trügg in dat Amt Veern un weer dor ok Struktuarius.[1] Later is he in Veern Amtmann worrn un is dat bet to sien Dood 1824 bleven.[1] In de Franzosentied is he in’n Oktober 1810 Ünnerpräfekt von’n Distrikt Veern worrn.[5] Na dat Enn von de Franzosentied is he denn aver wedder Amtmann ween.
He hett an’n 26. Dezember 1794 in Ehrenborg Wilhelmine Julianne Elisabeth Strube (5. September 1778-6. April 1827) freet.[1] De beiden harrn acht Kinner, ünner annern Charlotte Amalie Regine (1795–8. Juni 1840), Barthold Georg (1796-1801), Friedericka Dorothea (* 1. Oktober 1797), Wilhelm Friederich (* 1799), Friederich Ernst (* 1801) un Antoinette Auguste (* 1802).
Footnoten ännern
- ↑ a b c d e f g Die Pastoren von Kolenfeld 1578-1939
- ↑ a b Gunnar Henry Caddick: Die Hannöversche Landsmannschaft an der Universität Göttingen von 1737 - 1809, Göttingen 2009, Nr. 00701
- ↑ Annalen der Braunschweig-Lüneburgischen Churlande. Pockwitz, Hannover 1790, Band 4, Sied 227
- ↑ Annalen der Braunschweig-Lüneburgischen Churlande. Pockwitz, Hannover 1791, Band 5, Sied 199
- ↑ Augsburger Allgemeine Zeitung. 17. August 1810