Garmarna

Garmarna is en sweedsche Folkrockgrupp, de sünners Egenkompositschonen un olle skandinaavsche Balladen speelt. Bi Garmarna steiht en rockige Musik mit elektroonsche Effekten in’n Vördergrund.

Optritt vun Garmarna 2002 in Bochum

Historie vun Garmarna

De Grupp is 1990 vun de dree jungen Lüüd Stefan Brisland-Ferner, Gotte Ringqvist un Rickard Westman ut Sundsvall grünnt worrn. Se harrn in’t Theater to dat Stück Hamlet olle sweedsche Musik höört, de jem dat so andoon harrn, dat se anfüngen na olle Melodien un Instrumenten to söken. Een Johr later keem Jens Höglin as Slagtüüchspeler dorto.

In’t Johr 1992 hebbt se jemehr eerste EP produzeert. För de Fronsstimm hebbt se jemehr langjohrige Fründin Emma Härdelin inlaadt, de mit ehr hellen Stimm en goden Kontrast to de düstere Atmosphäär vun de Musik setten de. Dat üm so mehr, as ehr natürliche Stimm nich dör en klassische Singutbilln överprägt worrn weer. Dat Debut vun de Grupp hett sik goot verköfft. Gliektietig geev dat ok en Tour dör Skandinavien. Emma Härderlin is in dat Johr dorop denn offiziell Liddmaat vun Garmarna worrn.

Bi dat nafolgen Album Vittrad sünd bi’t Afmischen Sequenzers un Sampling-Technik insett worrn. Dat Album is 1994 in de USA mit engelsche Översetten vun de ollen Texten rutbröcht worrn. Dorna hett de Musikgrupp en lange Tour dör Düütschland maakt un keem 1996 mit dat nächste Album Guds Spelemän op’n Markt, dat sik in Sweden goot verköfft hett un internatschonal gode Kritiken bröcht hett.

1998 hett Garmarna en Reeg vun Kunzerten in Karken in Noordsweden geven. Tosamen mit de Schauspelersche Felicia Konrad hebbt se jemehr Interpretatschoon vun de Arbeiten vun Hildegard von Bingen ut’t Middelöller vörstellt.

Dat drüdde Album keem 1999 ünner den Titel Vedergällningen rut. De Produkschoon hett sik dorbi mehr as Rockmusik un Triphop orienteert. In’n Ansluss doran, hett de Grupp in’t Studio dat Album Hildegard von Bingen vullstännig maakt un afslaten. De Prodkuschoon keem 2001 rut. Dat Album is en musikaalsch Ümsetten vun latiensche Texten vun Hildegard vun Bingen. De Musik hett hier blots wenig mit Rockmusik to doon, man mischt Melodien un Kläng ut dat Middelöller mit Elementen vun de modernen elektroonschen Musik.

Liddmaten

• Stefan Brisland-Ferner: Vigelien, Nyckelharpa un Sampler.
• Emma Härdelin: Gesang und Vigelien.
• Jens Höglin: Slagtüüch un Percussion.
• Gotte Ringqvist: Luut, Vigelien un Achtergrundgesang.
• Rickard Westman: Gitarr, Bass, E-Bow.

Diskografie

Alben

• 1993: Garmarna (EP; 2003 mit söss ne’e Leder nee opleggt)
• 1994: Vittrad
• 1996: Guds Spelemän
• 1999: Vedergällningen
• 2001: Hildegard von Bingen

Singles

• 1996: Herr Holger
• 1997: En gång ska han gråta
• 1999: Gamen
• 1999: Euchari

Utteken

Garmarna is 1996 mit den Iesern Eversteiner uttekent worrn.

Weblenken

• Offizielle Websiet (engelsch)
• Northside Biographie
• Interview vun 2001