Glenturret

Glenturret is en Whisky-Brenneree bi Crieff an’n Stroom Turret, Perthshire Schottland. De Brenneree höört to’n Spirituosenkunzern The Edrington Group un seggt vun sik sülvst, dat se de öllste Destille vun Schottland weer, de noch produzeren deit.

Glenturret
De Brenneree Glenturret (Foto: Jonathan Billinger)
Land	Schottland
Region	Highlands
Tyyp	Malt
Status	aktiv
Besitter	The Edrington Group
Grünnt	1775
Waterborn	Loch Turret
Washstill(s)	1 × 12.500 l
Spiritstill(s)	1 × 9.000 l
Produkschoonsvolumen	340.000 l
Websteed	www.glenturret.com

Historie

De Destille tellt to de öllsten in Schottland. Al 1717 schall hier hier illegal Whisky brennt worrn wesen. De hüütige Single-Malt-Brenneree is in’t Johr 1775 boet worrn. Dat is ok dat Johr, dat op de Buddels steiht, de hüüt in’n Hannel sünd.

To de Tiet vun de slechten weertschopplichen Laag in de laten 1830er Johren, weer Glenturret de eenzige vun tallrieke Destillen an’n Stroom Turret de bestahn bleev. As de Weertschopslaag beter weer, künn de dormolige Besitter Thomas Stewart 1870 de Brenneree vergröttern. Twüschen 1929 un 1959 weer de Destille aver dicht maakt. Se is 1957 vun James Fairlie köfft worrn, de 1960 de produkschoon wedder ingang bröcht hett. 1981 keem Cointreau et Cie as Geldgever dorto. 1990 weer Glenturret vun de Highland Destillers övernahmen, de 1999 denn sülvst vun de Edrington Group köfft worrn is.

Brennblaas vun Glenturret

Glenturret is bitpo ok bekannt wegen jemehr Huuskatt Towser, de dat bit in’t Guinness-Book vun de Rekorden schafft hett. Se is mit 24 Johren för Katten utermatig oolt worrn un schall in de Tiet 28.899 Müüs fungen hebben. Se is 1987 doodbleven. 1991 is to ehrn Andenken un Ehren en Statue bi de Destille opboet worrn.

Glenturret hett en Besökerzentrum, dat 1981 as een vun de eersten in Schottland apen maakt weer. De Brenneree kann ok bekeken warrn. De Swoorpunkt vun dat Zentrum liggt aver weniger op Glenturret-Whisky as mehr op den Blended Whisky The Famous Grouse vun den Mudderkunzern.

Produkschoon

Single-Malt-Whisky vun Glenturret

De Brenneree tellt to dat schottische Whiskyrebeet Highlands. Se kriggt ehr Water ut den Loch Turret. Dat Molt warrt nicht sülvst maakt, man ut de Molteree vun de Tamdhu-Brenneree köfft. In de Destille gifft dat een Meeschfatt (mash tun) ut Holt vun 11,4 t un acht Gäärfatten (wash backs) ut Douglasienholt. Brennt warrt in twee Brennblasen: een wash still vun 12.500 l un en spirit still vun 9.000 l.

Kiek ok

• List vun de schottischen Brennereen

Literatur

• Charles MacLean (Rutgever): Whisky. World Guide, Regions, Distillers, Malts, Blends, Tasting Notes. Dorling Kindersley, London et al. 2008, ISBN 978-0-7566-3349-3.
• Walter Schobert: Das Whiskylexikon. Fischer Taschenbuch Verlag, Frankfort an’n Main. 2003, ISBN 978-3-596-15868-3.

Weblenken

Glenturret. Mehr Biller, Videos oder Audiodateien to’t Thema gifft dat bi Wikimedia Commons.