Gräzistik

De Gräzistik oder Ooldgreeksche Philologie is de Wetenschop vun de Spraak un Literatur in de Ooldgreeksche Spraak. Dat kummt nich faken vor, dat de Terminus Gräzistik for de Wetenschop vun de ganze Greeksche Spraak, also as Upper-Begreep ok for de Byzantinistik un de Wetenschop rund um de Neegreeksche Spraak umto (Neogräzistik) bruukt warrt. In Grekenland heet dat Studium vun de Gräzistik eenfach Φιλολογία (Philologie). Dat warrt denn avers meist noch updeelt in verschedene Twiege.

Gräzistik kann an en Reeg vun düütsche Universitäten studeert weern. De mööglichen Afslüsse sund: Magister, Staatsexamen un Bachelor/Master. Tohopen mit de Latinistik maakt de Gräzistik de so nömmte Klassische Philologie ut, de to de Klassische Wetenschop vun de Ole Tied tohören deit.

Bi dat Studium vun de Gräzistik geiht dat bit up den hüdigen Dag sunnerlich dor um, leifig mit de Ooldgreeksche Spraak um to gahn, tominnst in de ehre schriftliche Form. Dat warrt instudeert dör dat Oversetten vun Greeksche Texte in de Düütsche Spraak, man ok annerrum, dör Oversetten vun düütsche Texte in dat Ooldgreeksche. Vunwegen, datt de Gräzistik sik, just so, as de Latinistik, sik mit Spraak un Literatur befaten deit is dat bi dat Studium dor ok up afsehn, nich blot leifig mit de Spraak um to gahn, man ok de Greeksche Literatur oorntlich kennen to lehren. Ok Studenten vun de Latinistik mütt en beten wat vun de Gräzistik afweten. Jedeen Latien-Studenten mutt bit up düssen Dag dat Graecum hebben. Ok Studenten vun de Klassische Archäologie un vun de Ole Historie mütt normolerwiese dat Graecum hebben un mit de Ooldgreeksche Spraak um to gahn weten.