Grote Pest vun 1709/1710
De Grote Pest von 1709/1710 weer en Pestepidemie, de vör allen in Oostprüßen toslaan hett.
Dat schall in’n Harvst 1708 wesen hebben, dat de Pest von Polen her toeerst na Westprüßen insleppt worrn weer. Vörher harr dat swore Winter geven un de Aust weer slecht wesen. Bald harr de Pest sik denn na Oostprüßen utbreedt un is denn mit de Tied jümmer mehr na Oosten wannert. Ok de Winter 1709 weer wedder besünners swoor.
Oostprüßen harr to disse Tied so bi 600.000 Inwahners, dorvon sünd so 241.171[1] in disse twee Johr doodbleven. In enkelte Delen von dat Land sünd aver bet 90 % von de Minschen doodbleven. Lyck to’n Bispeel hett twischen August un Dezember 1710 1800 Dode hatt un blot 273 Lüüd sünd in de Stadt nableven[2]. Ok Prüßisch-Litauen hett dat besünners swoor drapen. Vele Dörper in Oostprüßen weren kumplett wööst un keeneen harr överleevt.
In de Tied na de Pest kemen över 20.000 ne’e Kolonisten na Oostprüßen, mank jem ok vele Mennoniten[3]. Vör de Pest weer de Andeel von Litauers in Prüßisch-Litauen bi 90 %. Mit de ne’en Siedlers güng de Andeel düchtig raf un dat weer ok de Grundsteen, dat jümmer mehr Litauers von de Düütschen assimileert worrn sünd.