Gustav Leopold Klein
Gustav Leopold Klein (* 25. Januar 1794 in Klein Sunkeln; † 12. Februar 1862 in Kowalken) weer en düütschen Verwaltungsbeamten.
Klein is 1794 as een von acht Kinner von Marie Eleonore, borene Schulz-Gronden (1760–4. September 1823), un Karl Ludwig Klein (27. Februar 1749–14. Februar 1830) in Klein Sunkeln boren.[1] Klein hett Privaatünnerricht kregen un hett 1810 anfungen, an de Universität Königsbarg Juristeree to studeren.[2] Sien Studium hett he ünnerbraken, üm an de Befre’ungskriege gegen Napoleon deeltonehmen.[2] He weer 1813/1814 freewilligen Jäger un 1815 as Sekondeleutnant in dat twete Landwehrinfanterieregiment.[2] 1815 is he Hülpsarbeider bi de Regerung Gumbinnen worrn un 1818 Kreissekretär bi dat Landraadsamt in’n Kreis Lötzen.[2] Dor weer he en Tied lang ok Verwalter för dat Amt as Landraad, ünner annern 1826 na’n Dood von Landraad Karl Theodor von Przyborowski.[2] He hett sik as sien Nafolger beworven, is aver nich nahmen worrn.[2] 1827 is Klein wegen Deenstunfähigkeit in Rohstand versett worrn.[2] He hett in de eerste Hälft von dat Johr 1829 von Gustav Mielke dat Good Kowalken köfft[3] un na disse Tied dat Good bewirtschaft.[2] Von 1835 bet 1837 weer he Kreisdeputeerten in’n Kreis Goldap.[2] 1835 weer he ok al interimistisch Verwalter för dat Amt as Landraad, nadem Landraad Gotthold Samuel Abraham Seemann doodbleven is.[2] He is 1836 as Kannedaat för den Landraad opstellt worrn.[2] Dat Binnenministerium hett denn aver en ne’e Wahl anordnet.[2] He is denn mit 16 von 24 Stimmen wedder as Kannedaat wählt worrn.[2] 1837 is he toeerst kommissarsch un 1838 richtig Landraad von’n Kreis Goldap worrn.[2] Klein weer 1845 tiedwies Zivilkommissar för dat Afsenken von de groten Masuurschen Seen, wat militäärsche Grünn harr.[2] Bet 1855 weer he ok Grenzkommissar för de Grenz na dat Königriek Polen.[2] Dat Amt as Landraad harr he bet 1856, as he in Rohstand versett worrn is.[2] Na em is Bruno Freiherr von Schrötter Landraad ween.
Klein weer Maat in’n Provinziallanddag Prüßen un von 1850 bet 1852 för den Wahlkreis Gumbinnen 6 Maat von dat Prüüßsche Aforntenhuus.[2] 1850 weer he Afornten in dat Erfurter Unionsparlament för den Wahlkreis 5 (Darkehmen, Angerburg, Goldap) von de Provinz Prüßen.[2]
Klein hett 1816 Henriette Hauke (16. Juli 1796–18. März 1847) freet.[1] De beiden harrn den Söhn Hermann Leo Klein (1826–1871).[1]