Gwendolyn Lizarraga

Gwendolyn Margaret „Gwen“ Lizarraga (borene Gwendolyn Margaret Smith, faken ok Madam Liz nöömt; * 11. Juli 1901 in Maskall; † 9. Juni 1975 in Belize-Stadt) weer en Politikerin ut Brietsch-Honduras (PUP).

Leven ännern

Gwendolyn Margaret Smith is 1901 as Dochter von Guadalupe, borene Baeza, un Sidney Smith in Maskall (to de Tied Deel von de Kolonie Brietsch-Honduras) boren. Se güng op de Mr. Datsun Primary School, de St. Mary’s Primary School un de St. Catherine’s Academy in Belize-Stadt. Se hett an’n 28. März 1926 Victor Manuel Lizarraga freet.[1] De beiden harrn fiev Kinner, ünner annern den Söhn Adolfo Lizarraga (26. Dezember 1935–23. November 2012).

As Ünnernehmerin hett se en Chicle- un Mahagoni-Farm bedreven.

Se hett sik för de Rechten von de Froonslüüd in de brietsche Kolonie stark maakt un 1959 de United Women’s Group (UWG) grünnt, wat en Intressengrupp för Froonslüüd binnen de PUP is. Tosätzlich weer se Mitgrünnerin von de United Women’s Credit Union.

Lizarraga is an’n 9. Juni 1975 doodbleven un liggt op’n Lord’s Ridge Cemetery in Belize-Stadt begraven.

Politik ännern

Se weer bet 1965 in’n Stadtraad von Belize-Stadt.[2]

Bi de Parlamentswahl in Brietsch-Honduras 1961 weer se Kannedatin för de PUP in’n Wahlkreis Pickstock un hett de Wahl mit 68,6 % von de Stimmen gegen Jaime Staines von de NIP un Clare Gill von de CDP wunnen. Bi de Wahlen 1965 (68,3 % gegen Jaime Staines, NIP) un 1969 (64,6 % gegen Charles Woods, NIP) kunn se sik in’n sülven Wahlkreis ok wedder dörsetten. Bi de Wahl 1974 is se nich wedder antreden. Kannedaat för de PUP un Winner von dat Mandaat weer ehr Söhn Adolfo Lizarraga.

Dormit weer se von’n 26. März 1961 bet 31. Dezember 1963 Afornte von de Legislativversammlung, de to’n 1. Januar 1964 in dat Repräsentantenhuus övergahn is. In dat Repräsentantenhuus hett Lizarraga denn noch bet to’n 30. Oktober 1974 seten. Se weer de eerste Fro in Legislativversammlung un Repräsentantenhuus.

Se weer in düsse Tied in dat Kabinett Price I von’n 27. März 1961 bet 6. Januar 1964 Ministerin för Bildung, Gesundheit un Huusbo un müss denn de Ministerämter an James Wilson Macmillan afgeven.[1] An’n 5. März 1965 is se in dat Kabinett Price II wedder Ministerin för Bildung un Huusbo worrn, wat se bet 1969 bleven is.

Ehren ännern

To Königin Elisabeth II. ehren Geboortsdag 1955 is Lizarraga Member of the Order of the British Empire worrn.

De Gwen Lizarraga High School in Belize-Stadt is na ehr nöömt. Ok de Gwen Lizarraga Street un de Madam Liz Avenue (all beid in Belize-Stadt) hebbt na ehr jemehr Naams kregen.

1992 weer se op en 25-Cent-Breevmark afbillt, de in de Reeg Famous Belizeans rutkamen is.

Footnoten ännern

  1. a b Personalities Caribbean. Personalities Limited, 1971, Sied 258
  2. Myrtle Palacio: Belize City Council Election Results 1962 to 2003