Hagolt

Wapen/Flagg	Koort
Basisdaten
Bundsland: Neddersassen Landkreis: Horborg Gemeen: Seevdaal
Inwahners:
Postleettall:	21217
Vörwahl:	040
Geograafsche Laag:	53° 26′ N, 10° 5′ O

Hagolt (hoochdüütsch Hagolt) is en lütten Oort in de Gemeen Seevdaal in’n Landkreis Horborg, Neddersassen. De Oort höört polietsch al von öllers bi Over mit bi. In dat 20. Johrhunnert is de Oort kumplett mit Bullenhuus un Over tohoopwussen.

Geografie

Hagolt liggt achtern Diek von de Elv in de Masch.

De Naveröörd sünd Gauert in’n Noorden, Oortkaten in’n Noordoosten, Hogendiek in’n Oosten, Overhaken un Over in’n Süüdoosten, Hössen un Freeswardermoor in’n Süüdwesten, Lütt un Groot Moor in’n Westen un Bullenhuus in’n Noordwesten.

Historie

Hagolt oder Hagelt weer fröher de Naam för en Rebeed, dat butendieks twüschen Over un Gauert leeg. De Loop von de Elv weer to de Tied noch en annern. Vondaag warrt dat Rebeed von’n Hauptloop von de Elv innahmen. De olen Butendieksrebeden sünd dör de Hauptdieken, de na de Stormflood 1962 anleggt worrn sünd, nu Deel von Bullenhuus un Gauert. Von dat ole Rebeed Hagolt is blots de lütte Oort bi Over an dat linke Över von de Elv nableven un dat Landschopsschuulrebeed Hagelt bi Gauert in’n Hambörger Stadtdeel Ossenwarder. Den Rest hett de Elv mitnahmen oder is dör den Diekbo verswunnen.

Verwaltungsgeschicht

De Oort hett vör 1885 to de Vaagdie Neeland-Over in dat Amt Horborg tohöört. Na 1885 weer dat in’n Kreis Horborg. 1932 is dat Deel von’n ne’en, grötteren Landkreis Horborg worrn.

De Oort is as Deel von de Gemeen Over an’n 1. Juli 1972 mit de Gemeenreform in Neddersassen Deel an de Gemeen Seevdaal kamen.

Inwahnertall

Johr	Inwahners
1824-00-001824	3 Füürsteden
1848-00-001848	31 Lüüd, 4 Hüüs
1871-12-011. Dezember 1871	39 Lüüd, 3 Hüüs

Religion

Hagolt is evangeelsch-luthersch präägt un höört siet 1948 to dat Kaspel Mäkelfeld. Vörher hett de Oort to dat Kaspel von de Mauritius-Kark in Hittfeld höört. De Kapell Over is 1952 boot worrn un steiht in Hagolt.

För de Kathoolschen is de Goden-Hirt-Kark in Winsen tostännig.

Weertschop un Infrastruktur

Verkehr

Hagolt liggt an de Kreisstraat 25, de in’n Noordwesten över Bullenhuus na Neeland un Horborg löppt un in’n Süüdoosten to de K 1 warrt un över Rosenweid, Flegenbarg un Hoopt na Winsen geiht. In’n Westen geiht en lüttjere Straat na Groot Moor.

De nächste Autobahn is de Autobahn 1. De Opfohrt 38 Horborg liggt so acht Kilometer in’n Noordwesten von Hagolt. De Opfohrt 5 Horborg-Midd op de A 253 liggt mit dat Auto söven Kilometer in’n Noordwesten, de Opfohrt 2 Maschen op de A 39 negen Kilometer in’n Süüdwesten un de Opfohrt 35 Fleest op de A 7 ölven Kilometer in’n Westen.

De nächsten Bahnhööv sünd so bi söss Kilometer wied weg in’n Süüdwesten de Bahnhoff Maschen un de Bahnhoff Mäkelfeld an de Bahnlien Hannover–Hamborg.