Hana Mašková
Hana Mašková (* 26. September 1949 in Prag; † 31. März 1972 bi Vouvray in Frankriek) weer en tschechisch Ieskunstlöperin, de in’n Eenzelloop för de Tschechoslowakei start is. Se is de Europameesterin van 1968.
Leben un Loopbahn ännern
As Kind hett Mašková völ Daag in dat Prager Štvanice Stadion verbrocht. Trainer Karel Glogar, de all Alena Vrzáňová an den Anfang van hör Loopbahn betrüet harr, hett hör Talent sehn. De nächst Trainer van Mašková weer Jaroslav Sadílek, bevör se af 1963 van Míla Nováková traineert wurr. Neben hör täglich Training hett se ok noch Klaveerspelen un de düütsch Spraak lehrt.
Hör eerst Europameesterschap hett Mašková all 1963 bestreeden. Een Johr later nehm se mit 15 Johr an de Olympisch Winterspelen 1964 in Innsbruck deel un kemm up Platz 15. Ok an de Weltmeesterschapen hett se in dat Johr deelnommen. In de Johren 1965 bit 1969 wurr Mašková tschechoslowaaksch Meesterin. Hör eerst internatschonale Medaillen wunn se in dat Johr 1967. In dit Johr wurr se Viez-Europameesterin achter Gabriele Seyfert ut de DDR, aber vör Zsuzsa Almássy. Bi de Weltmeesterschap wunn se de Bronzemedaille achter Peggy Fleming (USA) un Seyfert. In dat olympisch Johr 1968 wurr Mašková in dat sweedsch Västerås Europameesterin. Dat weer dat eerste un eenzige Mal, dat se Gaby Seyfert slahn kunn. Dart bit dissen Wettstriet wurr Beatrix Schuba ut Öösterriek. Bi de Weltmeesterschap in Genf un den Olympisch Spelen in Grenoble hett se jewiels de Bronzemedaille haalt, beid Malen achter Fleming un Seyfert. Se is bit vandaag de eenzige Tschechin, de in dat Ieskunstloopen van de Damen en olympisch Medaille haalt hett. 1969 wunn Mašková mit Sülver achter Seyfert und vör Schuba bi de Europameesterschap in Garmisch-Partenkirchen hör letzt Medaille. Bi de Weltmeesterschap in dat glieker Johr muss se torüchtrecken.
Mašková gull besünners as Sprungtalent, weer aber ok en elegante un künstlerisch goot Löperin.
1969 hett Hana Mašková hör Loopbahn bi de Amateuren afslooten un is to de Ieskunstlooprevue Holiday on Ice wesselt. Dree Johr later is se bi en Autounfall dicht bi de Stadt Vouvray in Frankriek to Dood kommen. [1] Hör Graff befinnd sück up den Vyšehrader Karkhoff in Prag. De tschechisch Bildhauer Jan Štursa hett en Statue van en wievlich Torso mit Flögels för dat Graff van Mašková herstellt.[2]