Haneborg

De Haneborg (oder Hanebörg) is en tweeflögelig Wahnslott ut root Backsteen in de Oltstadt vun Leer in Oostfreesland.

Haneborg in‘n Haneborgpark

Laag

Dat Slott befinnd sück an dat Enn‘ vun de vun Kastanien süümt Haneborgallee in dat Ensemble bun de nedderlannsch beinfloot Oltstadt vun Leer.

Geschichte

De Haneborg wurr 1570 vun Claes Frese, den letzten Drost vun Leeroort, Leer, Hint un Uttum as Herrenhuus an de Blinke baut. Ansluutend keem de Herrensitt in den Besitt vun de hüüd naamgevend Familie Hane.

De gräfliche Drost Joest Hane to Stickhuusen hett dat oorsprüngliche Querhuus 1621 um en körten Flögel in’n Renaissance-Stil nedderlannsch Prägung mit Doorbagen utwiet. An disen Umbau erinnert de hüüd noch to lesen Inschrift över den Doorbagen to de Wahnborg: „Anno 1621 hat Heer Joest Hane zu Werff, Lihr und Uttum Haubtling und Adde Frise gebohren Dochter zu Hinte und Grohthusen dis haus gebauwt“.

1671 hett Joest Hane sien Sohn Didrich Arend Hane den Anbau van 1621 to Enn‘ brocht. An dissen Umbau erinnert de Inschrift över den Hööftingang: "Anno 1671 Den 3 Juny Hat Heer Didrich Arent Hane zu Lihr und Uttum Haubling und Frau Anna Margareta gebohren Baronne von Kniphausen dieses haus angefangen zu bauwen und ist ververtiget den 30 Septemb: Anno 1671. Symb: Dei Gratia Fortitudo Mea."

1908 hett de Stadt Leer de Haneborg köfft. In‘n Juni 1912 wurrn de Rüüm vun den Heimatschuulvereen in de Haneborg inweeht. 1920 hett de Vereen för Heimatschuul un Heimatgeschichte de Haneborg vun de Stadt Leer köfft. Nah umfangriek Umbaumaatnahmen wurr in’n Oktober 1926 dat Heimatmuseum in de Haneborg apen maakt. All in’n September 1934 hett de Stadt Leer vun hör Rückkooprecht Gebruuk maak un de Haneborg torüch köfft, de kört dorup to’n 1. Oktober 1934 an den Rieksnährstand verhüert wurr. 1935 wurr de Haneborg umbaut un renoveert un um en tweet Querhuus utwiet. An‘n 8. Januar 1936 wurr in de Haneborg de SA-Buernhoochschool inweeht. Af 1941 wurr se denn as Lazarett bruukt.

Nah den Tweeten Weltkrieg wurr de Haneborg to’n Öllersheim. 1973 ist dat temelk rünnerkommen Bauwark vun den Landkreis Leer övernommen wurrn un bit 1976 upwendig renoveert. Hüüd deent de Haneborg as Sitt vun de Geschäftsstäe un as Seminarbauwark vun de Volkshochschule für die Stadt und den Kreis Leer e.V. un wurrd ok för Kunstutstellungen un Tagungen bruukt.

De historschen Binnenrüüm sünd nich mehr vörhannen. De Butenanlagen kann man sück ankieken.

Literatur

• Hajo van Lengen: Die Haneburg. Ein Denkmal der Baukunst und des Adelsstandes in Leer. In: De Utmiener. Jahrbuch des Heimatvereins Leer, Band 2, 2017, Schlösser und Burgen in und um Leer, S. 141–158.

Weblinks

Haneborg. Mehr Biller, Videos oder Audiodateien to’t Thema gifft dat bi Wikimedia Commons.

• Landkreis Leer: Das Baudenkmal „Haneburg“
• De Evenborg, de Haneborg un dat Goot Stikelkamp in dat Kulturportal Nordwest