Hans-Hinrich Schulz

Hans-Hinrich Schulz (* 13. Februar 1955) is en düütschen Ünnernehmer ut Bliersdörp.

Leven

Schulz is 1955 boren. Veel Geld hett he na de düütsche Weddervereenigung mit Kieskuhlen, Kalksandsteen- un Betonsteenwarken un Gewarvimmobilien in de ne’en Bundslänner maakt. Dor hett he ünner annern för Aldi un REWE Immobilien entwickelt.

An’n 23. September 2000 is he in Bliersdörp-Postmoor mit sien privaten Helikopter von’n Typ Bell 407 afstört, is aver nich swoor verletzt worrn.

Ünnernehmens

Sunseeker

Schulz hett de Andelen von Axel Krick an de Sunseeker Germany AG mit Sitt in Öinusen övernahmen, wat de düütsche Verdriev von’n Jachtboer Sunseeker International is. Krick harr dat Ünnernehmen 1972 as Yachtcenter Krick grünnt. 1998 is dat Ünnernehmen to en Aktiensellschop worrn. Toeerst weer de twete Sellschopper blangen Schulz Pete Gruber, de sien Andelen aver 2003 an Schulz afgeven hett. Siet 2003 weer Schulz also Alleenbesitter von de Sunseeker Germany AG. He weer ok Vörstand von de AG. 2004 hett dat Ünnernehmen sien Sitt na Hamborg verleggt. Sien Andelen an de Sunseeker Germany AG hett Schulz 2009 an de Jürgen-Dorsch-Grupp verköfft. Verbunnen mit de Sunseeker Germany AG hett Schulz sik ok in’n Jachtbo engascheert. 2002 hett he dat Ünnernehmen A&R Neptun Boat Service in Rostock (vörher Deel von de Neptun-Warft) övernahmen, dat denn den ne’en Naam SMG-Warft kregen hett. De SMG-Warft AG hett in Lizenz Sunseeker-Jachten boot. Siet 2006 löppt dat ünner’n Naam Mazarin Yachts. Ok hier is Schulz 2009 as Sellschopper utscheden.

Schulz AG

Schulz hett in’n August 1997 dat Mercedes-Autohuus-Ünnernehmen Rennecke und Lange & Sohn köfft. Rennecke und Lange & Sohn is sülvs kort vörher dör de Fusion von dat Autohuus Rennecke mit Standöörd in Achem, Rodenborg un Veern un dat Autohuus Lange & Sohn mit Standöörd in Zeven un Zittens tostann kamen. Dat Ünnernehmen hett 1998 den ne’en Naam Schulz GmbH & Co. KG kregen. 1999 hett dat Ünnernehmen dat Scheeßler Fohrtüüghuus övernahmen un 2000 de Lkw-Sparte von de W. Böse GmbH. 2002 hett sik de Ünnernehmensform op en Aktiensellschop ännert. Dat Ünnernehmen Janitschke Nutzfahrzeughandel in Bokel hett de Schulz AG in’n September 2009 övernahmen un dor Hansaline Trucks ut maakt. In’n November 2010 hett de AG dat Autohuus Hillmer in Bookholt köfft.

De Schulz AG harr 2013 söven Autohüüs in Achem, Bookholt, Eiten, Rodenborg, Zittens, Veern un Zeven un weer mit 55,5 Milljonen Euro Ümsatz een von de gröttsten Mercedes-Händlers in Düütschland. Dat Ünnernehmen harr mehr as 300 Lüüd in Lohn un Brood. De AG hett an’n 12. April 2013 bi dat Amtsgericht Veern en Insolvenzandrag stellt. Dat Ünnernehmen is in’n Juni 2013 opdeelt worrn: de Autohüüs in Achem, Veern un Eiten sünd an dat Autohuus Anders ut Vechte gahn, de Standoort Rodenborg an dat Ünnernehmen SternPartner ut Ülzen un de Autohüüs in Zeven un Zittens an dat Autohuus Tesmer ut Buxthu. An de ne’en Besitters övergahn sünd de Autohüüs an’n 1. Oktober 2013. Blots de Standoort in Bookholt hett kumplett dichtmaakt.

Bald AG

Schult weer siet Januar 2011 tohoop mit Harald Gayk ok Hauptsellschopper von de Bald AG in Siegen, de Autohüüs-Standöörd in Noordrhien-Westfalen, Hessen un Rhienland-Palz hett. He hett sien Andelen in’n Mai 2013 an de MM Holding GmbH verköfft.

Immobilien

Schulz hett 2007/2008 op dat Gelänn von dat ole Birkel-Wark in Buxthu för 19,8 Milljonen Euro en neet Gebüüd mit Inkoopszentrum un Olen- un Pleegheim op 14.000 m² boot. Dat Gelänn is 2014 an de K-&-S-Ünnernehmensgrupp ut Söttmer verköfft worrn.