Heinrich Augustin

düütsch Politiker

Heinrich Augustin (* 30. Oktober 1937 in Ottens) is en düütschen Politiker von de CDU.

Augustin is 1937 in Ottens boren. Na dat Abitur in Buxthu hett he Juristeree un Bueree an de Universitäten Göttingen un Hamborg studeert. Na dat Diplomexamen 1964 hett he den Hoff von sien Vader övernahmen un Augustin weer Buur. 1969 hett he den Meester maakt.

Augustin is 1967 in de CDU rin. He is Bezirksvörsitter von de Junge Union worrn un later Viez-Bezirksvörsitter von de CDU. He weer ok Maat in’n Kreis- un Bezirksvörstand. Augustin is 1964 Raadsherr von de Gemeen Ottens worrn. Nadem Ottens 1972 Deel von Buxthu worrn is, weer he von 1972 bet 1986 Raadsherr in Buxthu un von 1976 bet 1986 2. Viez-Börgermeester von de Stadt Buxthu. 1976 is he ok Afornten in’n Kreisdag von’n Landkreis Stood worrn, weer dor Vörsitter von’n Finanzutschuss un siet 1983 CDU-Frakschoonsvörsitter. För den Wahlkreis Buxthu weer he in de 11. un 12. Wahlperiood (von’n 21. Juni 1986 bet to’n 20. Juni 1994) Liddmaat von’n Landdag von Neddersassen.