Heinz Eckhoff

Heinz Eckhoff (* 1925 in Obbens) is en düütschen Politiker von de CDU.

Leben

Eckhoff is 1925 in Obbens boren. In’n Tweten Weltkrieg is he 1943 Maat von de Waffen-SS worrn un weer dor bet an dat Enn von’n Krieg as Soldaat aktiv. Na’n Krieg weer Eckhoff Buur op’n Hoff in Obbens un hett mit Kartuffeln hannelt. 1968 is he op de List von de NPD in’n Kreisdag von’n Landkreis Stood intagen. 1970 is he in de CDU intreden. De CDU hett later seggt, dat Eckhoff keen Parteimaat von de NPD weer, he weer blots Kannedaat op de NPD-List. Na 1970 hett Eckhoff bet 2000 för de CDU in’n Kreisdag seten. Eckhoff weer ok Vörsitter von’n Kreisweegutschuss. Von 1972 bet 1976 weer he Börgermeester von de Gemeen Obbens un jüstso von 1972 af an Börgermeester von de Samtgemeen Obbens. He hett sik för de Partnerschop von Obbens mit de bretoonsche Gemeen Ploemel insett.

He weer ok Vörsitter von’n Vörstand von de Volksbank Geest. 1992 is he ut’n Vörstand utscheden.

Bundsverdeenstkrüüz

För siene Verdeensten as Börgermeester, as Vörstand von de Volksbank Geest un för sien Engagement in Verenen un Verbänn hett Eckhoff 2000 dat Bundsverdeenstkrüüz kregen. De CDU un de Landkreis Stood, de den Andrag op dat Verdeenstkrüüz stellt harrn, harrn dorbi aver de Informatschonen över sien Aktivität in de Waffen-SS un för de NPD utlaten. Dorüm hett dat kort later veel Kritik geven.

De Neddersassische Staatskanzlie (Kabinett Wulff II) hett dor op henwiest, dat se de Fakten nich kennt hett, hett aver toglieks seggt, dat de Fakten nich gegen dat Verdeenstkrüüz spraken harrn, harr de Staatskanzlie dor von weten.

Dat Bundspräsidialamt hett mitdeelt, dat Eckhoff över de kommunalen Steden in Neddersassen vörslahn worrn is. Dat Bundspräsidialamt harr nich sien kumpletten Levensloop övermiddelt kregen. En Sprekersfro von Bundspräsident Johannes Rau hett seggt, dat de Präsident den Fall as Anlass nehmen will, noch wedder de Länner optofeddern, „größtmögliche Sorgfalt bei den Ordensvorschlägen an den Tag zu legen“. Dat Bundspräsidialamt kunn na egen Angaven dat Verdeenstkrüüz aver nich mehr wedder trüggnehmen.

De Direkter von’n Jöödschen Weltkongress (WJC), Elan Steinberg, hett seggt, dat de Orden för Eckhoff en „Schandfleck för Düütschland“ is.

Irmela Mensah-Schramm, de 1994 en Bundsverdeenstmedallje för ehr Engagement gegen Rassismus kregen harr, hett de Medallje trügggeven, as se höört hett, dat Eckhoff dat Bundsverdeenstkrüüz kregen hett.