Helmut Grube
Helmut Grube (* 21. November 1913 in Hameln; † 8. Januar 1980 in Hemmoor) weer en düütschen Politiker.
Grube weer op dat Reformrealgymnasium in Hameln. 1933 hett he sien Abitur maakt un von April 1933 bet März 1935 Rechts- un Staatswetenschoppen an de Universität Göttingen studeert. An’n 1. April 1933 is he Liddmaat von de NSDAP worrn (Matennummer 1676875).[1]
In’n April 1935 is he Föhrer in’n Rieksarbeidsdeenst worrn. Von 1938 af an weer he op de Feldmeesterschool. 1940 weer he op de Verwaltungsschool un hett ehr mit de grote Verwaltungsprüfung afslaten. Na disse Tied weer he för annerthalf Johr in de böverste Rieksbehöörd in Berlin-Grunewald as Feldmeester in dat verwaltungsrechtliche Afdeel. Dat Johr achterna weer he bet an dat Enn von’n Krieg bi de Feldtöög in Oost un West in’n Rieksarbeidsdeenst von de Flakbatterien in’n Kriegsdeenst. Na’n Krieg is he 1947 Buur in Warstood worrn un güng denn in de DP.
Von 1952 af an weer Grube Maat in’n Opsichtsraat von de Überlandwerk Nord-Hannover AG in Bremen. He is ok Vörsitter von’n Opsichtsraad von de Wahnstedengenossenschaft för den Kreis Land Hadeln wesen. 1956 is he Verbandsvörstand von’n Waterbeschaffungsverband in de Wingst worrn. 1960 is he Vörsitter von’n Neddersassischen Gemeendag worrn un 1965 ok Viezpräsident von’n Düütschen Gemeendag.
Von 1948 bet to’n 30. Juni 1968 weer he Börgermeester von de Gemeen Warstood. In de Samtgemeen Warstood weer he von 1965 bet to’n 30. Juni 1968 ok Gesamtvörsteher. An’n 1. Juli 1968 is he de eerste Börgermeester von de nee grünnte Gemeen Hemmoor worrn as Övergang bet to de eersten Wahlen in’n Harvst, bi de em denn Herbert Müller von de SPD slahn hett. 1976 is Grube denn aver noch en twete Tied Börgermeester von Hemmoor worrn un is dat bet to sien Dood an’n 8. Januar 1980 bleven. In’n Kreisdag von’n Landkreis Land Hadeln weer he von 1953 af an in un weer dor later de Frakschoonsvörsitter von de CDU. 1968 is he Landraad worrn un dat bleven, bet de Landkreis Land Hadeln 1977 oplööst un Deel von’n Landkreis Cuxhoben worrn is. In’n ne’en Landkreis Cuxhoben weer he de eerste Tied för den Övergang Landraad bet Martin Steffens dat Amt övernahmen hett. He weer denn ok von 1977 bet to sien Dood in’n Kreisdag von’n Landkreis Cuxhoben. As 1972 de Samtgemeen Hemmoor grünnt worrn is, is he för den Övergang bet to de eerste Wahl Samtgemeenbörgermeester worrn. Bi de Wahl hett sik denn aver Herbert Müller von de SPD dörsett. He weer denn von 1976 bet to sien Dood noch en tweet Kehr Samtgemeenbörgermeester.
Grube weer von’n 6. Mai 1959 bet to’n 20. Juni 1978 in de veerte bet achte Wahlperiood Maat in’n Neddersassischen Landdag. He weer von’n 11. Mai 1959 bet 28. März 1962 Viez-Vörsitter von de DP-Landdagsfrakschoon. Von’n 29. März 1962 af an weer he Maat von de CDU-Frakschoon.
He hett dat Grote Verdeenstkrüüz von’n Neddersassischen Verdeenstorden un dat Verdeenstkrüüz Eerste Klass von’n Verdeenstorden von de Bundsrepubliek Düütschland kregen. In Warstood is de Börgermeester-Grube-Straat na em nöömt.
Grube is 1980 dör Hartverseggen doodbleven.
