Herbert Müller (* 30. Juni 1926 in Westersood; † 5. Juli 1995) weer en düütschen Politiker von de SPD un Heimatforscher.

Müller is 1926 in Westersood boren un weer dor ok op de Volksschool. He hett den bi de Portland Cementfabrik Hemmoor AG Slosser lehrt. He weer dor teihn Johr lang Vörsitter von’n Bedrievsraad un Industriemeester. Allens tohoop weer he 44 Johr lang bi de Portland Cementfabrik.

1984 hett he de Kulturstiftung Zement aus Hemmoor mit grünnt. Ok den Geschichts- un Heimatvereen Hemmoor hett he 1984 grünnt un weer bet Juni 1987 de eerste Vörsitter von’n Vereen.

Müller is 1952 in Westersood in’n Gemeenraad wählt worrn un is dor 1954 Börgermeester worrn. Dat is he bleven bet to’n 30. Juni 1968, as Westersood mit fiev annere Gemenen to de ne’e Gemeen Hemmoor tohoopgahn is. Bi de Kommunalwahl 1968 is he to’n Börgermeester von de Gemeen Hemmoor wählt worrn un is dat bet 1976 bleven.

As an’n 1. Juli 1972 de Samtgemeen Hemmoor billt worrn is, is he dor ok de eerste Samtgemeenbörgermeester worrn. Dat Amt hett he bet 1976 hatt un denn noch en tweet Kehr von 1981 bet 1984. In’n Kreisdag weer he meist 25 Johr lang in, toeerst bet 1977 in’n olen Landkreis Land Hadeln un denn in’n Landkreis Cuxhoben. Dat Amt as Kreisraad hett he 1980 afgeven.

Müller hett dat Bundsverdeenstkrüüz an’t Band kregen. An’n 6. Dezember 1984 hett he von de Stadt Hemmoor för de 30 Johr, de he al in’n Raad seten hett, den Ehrenring kregen un is Ehrenbörger un Ehrenbörgermeester worrn. An’n 1. Mai 1998 hebbt se bi dat Zementmuseum Hemmoor en Bronzreliefplaat von em opstellt. Na em is de Herbert-Müller-Weg in Westersood-Karkfellen nöömt.

Warken ännern

  • Westersode gestern und heute. 1983
  • Chronik Zement aus Hemmoor 1866-1983 - Gründung, Blütezeit, Niedergang. Sülvsverlag, Hemmoor 1992