Hilligendamm
Hilligendamm is en Seebad an de Oostsee. Dat höört to Doberan in’n Landkreis Rostock in Mekelnborg-Vörpommern.
Historie
ännernHilligendamm is dat öllste Seebad in Düütschland. Groothertog Friedrich Franz I. vun Mekelnborg hett dat 1793 as Seebad opboon laten. In de Johren vun 1793 af an bet 1870 hebbt ünner annern Johann Christoph Heinrich von Seydewitz, Carl Theodor Severin un Georg Adolph Demmler den Oort in’n Stil vun’n Klassizismus wieder utboot. 1872 hett Otto Baron von Kahlden dat Good Hilligendamm för 500.000 Rieksdaler köfft. Sien Söhn Rudolf von Kahlden hett dat denn 1910 wedder an Walter John Marlitt verköfft, de aver gau in Konkurs gahn is. Denn hebbt Hambörger Kooplüüd dat Good för 1,5 Millionen Goldmark köfft un de „Ostseebad Heiligendamm GmbH“ grünnt, de in’n Eersten Weltkrieg an dat Bankhuus Louis Wolff gahn is. 1924 hett Oskar Adolf von Rosenberg de GmbH övernahmen. 1939 hett dat Heer dat Seebad as Lazarett in Beslag nahmen, dat 1941 an de Dresdner Bank gahn is, ok vun wegen dat Rosenberg en Juden weer. As de Twete Weltkrieg vörbi weer, seet to DDR-Tieden de Fackschool för anwandte Kunst in dat Seebad. Dat güng bet 2000, as de Studenten na Wismar gahn sünd. 1996 hett de Entwicklungs Company Heiligendamm dat Bad för 18 Millionen D-Mark köfft. Dat Bad is denn to’n Luxushotel Kempinski Grand Hotel Heiligendamm ümboot worrn.
Vun’n 6. bet 8. Juni 2007 is dat Toppdrepen vun de G8 in Hilligendamm. Vun wegen de Proteste bi annere Drepens vun de G8, de faken mit Gewalt verbunnen weren, is dorto de ganze Oort mit en meist dörteihn Kilometer langen Tuun afspirrt worrn.
