Home Alone

Home Alone (op Plattdüütsch so veel as „Alleen to Huus“; dt. Titel: Kevin – allein zu Haus) is de Titel vun en US-amerikaansche Filmkummedie ut dat Johr 1990. In Düütschland is de Film in’n Januar 1991 in de Kinos kamen. Dat Dreihbook is vun John Hughes, Speelbaas weer Chris Columbus. De Hööftrull hett de dormols 10-jährige Macaulay Culkin speelt, de mit dissen Film bekannt worrn is.

Filmdaten
Plattdüütsch Titel:	—
Originaltitel:	Home Alone
Düütsch Titel:	Kevin – allein zu Haus
Produkschoonsland:	USA
Johr vun’t Rutkamen:	1990
Läng:	103 Minuten
Originalspraak:	Engelsch
Öllersfreegaav in Düütschland:	FSK 12
Filmkru
Speelbaas:	Chris Columbus
Dreihbook:	John Hughes
Produkschoon:	John Hughes
Musik:	John Williams
Kamera:	Julio Macat
Snitt:	Raja Gosnell
Dorstellers
Macaulay Culkin: Kevin McCallister Joe Pesci: Harry Lime Daniel Stern: Marvin „Marv” Merchants John Heard: Peter McCallister Roberts Blossom: De olle Mann Catherine O’Hara: Kate McCallister Angela Goethals: Linnie McCallister Devin Ratray: Buzz McCallister Gerry Bamman: Unkel Frank Terrie Snell: Tante Leslie Hillary Wolf: Megan McCallister Larry Hankin: Sergeant Larry Balzak John Candy: Gus Polinski Kieran Culkin: Fuller McCallister Senta Moses: Tracy McCallister Daiana Campeanu: Sondra McCallister Michael C. Maronna: Jeff McCallister

Inholt

De Film hannelt vun de US-amerikaanschen Grootfamilie McCallister, de över Wiehnachten Urlaub in Paris maken will. Ünner all de Kinner is ok Kevin, de sik vun all Bröder un Süstern slecht behannelt föhlt un nix maken dröff. An’n Dag vör’n Flaag gifft dat Striet twüschen em un eenige Liddmaten vun de Familie. An’t Enn warrt Kevin to Straaf in de Dackkamer insparrt. As an’n nächsten Morgen de Wecker nich bitiets klingeln deit, brickt in’t Huus Hektik ut. Allns mutt gau gahn, üm den Fleger noch to kriegen. Bi’t Aftellen vun de Kinner maakt se aver en Fehler, un so kummt dat, dat Kevin in de Kamer vergeten warrt un de Familie alleen na Frankriek losflüggt.

Kevin finnt sik alleen to Huus wedder. De Freid is groot, vun wegen dat he nu doon un laten kann, wat he will: nümms seggt em, wat he eten schall, un nümms, dat he wat nich in’t Feernsehn kieken dröff. Man, gau mutt he faststellen, dat en poor Inbrekers dat op dat Wahnveerdel afsehn hebbt. De beiden, Harry Lime un Marv Merchants, nöömt sik de „Fuchtigen Banditen“, vun wegen dat se de utroovten Hüüs naher jümmer ünner Water setten doot. Een vun jem hett sik as Polizist verkleedt un weer noch an’n Vördag in jemehr Huus, üm to kieken wat se för jemehr Sekerheit an’t Huus maakt hebbt.

Se weet natürlich toeerst nich, dat Kevin vergeten worrn is. Ofschoonst he bang is, lett sik Kevin ’n Reeg vun Tricks infallen, op de de Inbrekers rinfallt. An’n Hillig Avend wüllt de Inbrekers denn aver doch bi de McCallisters instiegen, as se rutfunnen hebbt, de blots en lütt Kind to Huus is. Mit Help vun all mööglichen improviseerte Fallen versöcht Kevin dat Huus to verdeffenderen bit sien Öllern un de Familie wedder torüch sünd. In de Twüschentiet is de Mudder ok lang al opfallen, dat se Kevin to Huus vergeten hett. As se lannt sünd, sett se allens doran, so gau as mööglich wedder na Huus to kamen, wat över Wiehnachten aver nich so eenfack is.

Kevin sleiht sik aver goot. Help kriggt de lütte Jung vun den ollen Marley, de ’n beten wunnerlich utsütt un den sien Broder vör de Afreis noch as’n Möörder dorstellt hett. In de Kark frünnt he sik aver mit em an. Opletzt kann Kevin de Inbrekers in de Flucht slahn un rüümt sogor noch rechttietig dat hele Huus wedder op, dat he vörher vun baven bit ünnen in Unschick bröcht harr. An’t Enn kriggt de Jung dat sogor noch torecht, den ollen Marley mit sien Söhn un den sien Familie to versöhnen.

Kritik

Lexikon vun’n internatschonalen Film: Eine ereignisreiche Komödie mit etlichen Anleihen beim Zeichentrick-Slapstick; Tempo und Witz stellen sich jedoch erst gegen Ende ein, vor der unvermeidlichen Familienversöhnung.

TV Spielfilm: Ob Kevins Verteidigungsmethoden pädagogisch vertretbar sind, ist fraglich, aber der junge Held sorgt mit seinen phantastischen Einfällen für köstliche Unterhaltung.

Utteken

De Film harr bannig Spood un weer för sössteihn Filmpriesen vörslahn, dorünner sogor tweemol för den Oscar. Wunnen hett de Film teihn Priesen, as to’n Bispeel:

• 1991: de Goldene Lienwand mit een Steern
• 1991: den Young Artist Award in de Kategorie Best Schauspeler in en Speelfilm för Macaulay Culkin
• 1991: den Blimp Award vun de Kids’ Choice Awards in de Kategorie Leefste Film
• 1991: den CFCA Award in de Kategorie Nawassen Schauspeler för Maycaulay Culkin
• 1991: den American Comedy Award in de Kategorie Lustigste Schauspeler in en Speelfilm för Macaulay Culkin
• 1991: den BMI Film Music Award för John Williams
• 1991: den British Comedy Award in de Kategorie Best Kummediefilm

Anners wat

Dreihöörd vun den Film weern to’n Bispeel de Stadt Winnetka in’n Bundsstaat Illinois un de Flaaghaven Chicago.

De Film hett en Budget vun ruchweg 15 Millionen US-Dollar bruukt, hett dorgegen aver weltwiet mehr as 500 Millionen US-Dollar inspeelt. He tellt dormit to de spoodrieksten Filmen vun all Tieten.

Vun den Film geev dat bit hüüt dree wietere Delen, wobi de meisten Schauspelers aver blots noch in den tweeten Deel mit dorbi weern. Ok Chris Columbus hett blots noch den tweeten Deel dreiht. De drüdde Deel weer direkt för’t Feernsehn produzeert. Dorin duukt de Figur Kevin gor nich op, ofschoonst he in’n veersten Deel den wedder de Hööftperson is.

• 1992: Home Alone 2: Lost in New York (dt. Titel: Kevin – Allein in New York)
• 1997: Home Alone 3 (dt. Titel: Wieder allein zu Haus)
• 2002: Home Alone 4 (dt. Titel: Kevin – Allein gegen alle)

Mit Hari Puttar – A Comedy Of Terrors is 2008 noch mol en Film rutkamen, de den eersten sotoseggen namaakt hett.

Literatur

• Morton Rhue: Kevin - allein zu Haus. Eine Familienkomödie ohne Familie. Düütsche Utgaav vun Eva Malsch. Lübbe, Bergisch Gladbach 1991, 143 S., ISBN 3-404-11697-6 oder ISBN 978-3-404-11697-3

Weblenken

• Home Alone in de Internet Movie Database (engelsch)
• Kritiken to’n Film op Rotten Tomatoes