Hominini

Hominini sünd en Tribus mank de Minschenapen. Dor höört de verschedenen Aarden vun dat Geslecht „Homo“ to (dormank de Homo sapiens) un de ehre utstorvenen Vöröllern, de noch nich to düt Geslecht rekent weert. Dat sünd de Australopithecina. Kennteken dorför, dat en Aart to de Hominini rekent warrt, is, dat he up twee Fööt steiht un liekup lopen deit. Wenn he bavenhen ok noch Steenwarktüüch (Pebble Tools) bruken deit, warrt he to de Minschen rekent.

Systematik

Mit de Minschen (dat Geslecht „Homo“) weert ok düsse Australopithecina to de Hominini tellt:

• Sahelanthropus (ümstreden)
• Orrorin (ümstreden)
• Ardipithecus
• Australopithecus / Kenyanthropus
• Paranthropus

Dörn’anner bi de Begrepen kümmt dorvun her, dat in de öllere Literatur dat Woort „hominid“ faken in’n Sinn vun „hominin“ bruukt warrt. Dat liggt dor an, dat de Paläoanthropologie sik bit in de laten 1990er Johre an Linné siene Taxonomie holen hett. Bi em weern de „Echten Minschen“ unner den Naam „Hominidae“ gegen de „Minschenapen“ („Pongidae“) mit de Orang Utans, Gorillas un Schimpansen över stellt.

Annere Forschers hefft dat noch anners maakt. Se hefft Schimpansen un Minschen in een Grupp tohopensteken un düsse Grupp nu ok „Hominini“ nömmt. Dor kann een um tämlich dör’nanner kamen.

Towielen güng dat dor ok um, de Grenzen twuschen de Minschen mit ehre Vöröllern un de Schimpansen un Gorillas mit ehre Vöröllern düütlich to maken. Denn sünd dor Unnerafdelen inföhrt wurrn (Stämm). Neven de „Hominini“ (Minschen un Vöröllern) gifft dat denn noch de „Gorillini“ (de Gorillas mit Vöröllern) un de „Panini“ (Schimpansen mit Vöröllern)

Anatomie

All Hominini gaht liekup up twee Been. Dor gifft dat sunnerliche Kennteken bi de Anatomie üm, de afwieken doot vun den Grundboplaan vun de Primaten.

• De Achterbeen sünd länger un ummuddelt to’n Lopen up twee Been.
• De achterlichen Fööt sünd ummuddelt: De Middelfootknaken is länger, de Töhn körter un mehr un mehr kann ok de grote Töhn nich mehr gegen de annern Töhn över stellt weern.
• Dat Becken is ummuddelt un de Pann vun dat Hüftlidd is grötter wurrn, üm gröttere Last up to nehmen.
• Dat Beken vun de Seken mit den Geboortskanal is ümboot.
• De Hannen an de Vörbeen sünd ummuddelt un de Hominini könnt nu beter griepen, as kladdern. Dor is de Middelhandknaken üm körter wurrn.
• De Bostkasten is mehr un mehr platter wurrn.

Literatur

• Henry Gee: Hominid and hominin. Nature, Band 412, 2001, S. 131.
• Winfried Henke, Hartmut Rothe: Stammesgeschichte des Menschen: Eine Einführung. Berlin: Springer, 1998, ISBN 978-3-540-64831-4; Volltext (Kiek sunnerlich S. 45 – 47).

Weblenken

• What’s the difference between hominin and hominid?
• Stammboom vun de Hominini