Horst Szymaniak

Horst Szymaniak (Ökelnaam Schimmi; * 29. August 1934 in Erkenschwick, Noordrhien-Westfalen, † 9. Oktober 2009 in Melle) weer en düütsch Footballspeler.

Leben

Szymaniak, de Bargmann lehrt hett, hett van 1943 bit 1955 bi de SpVgg Erkenschwick (2. Liga West) speelt. Dornah is he för en Aflösesumme van 15.000 DM to’n Wuppertaler SV wesselt, 1959 to den Karlsruher SC un gehör nah Ludwig Janda un Horst Buhtz to de eerst düütsch Speler (neben Helmut Haller, Albert Brülls un Karl-Heinz Schnellinger), de nach Italien wesselt sünd. Szymaniak speel dor anfangs van 1961 bit 1963 bi CC Catania, 1963–64 bi Inter Mailand un 1964–65 bi Varese FC; 1964 wunn he mit Inter Mailand den Europapokal vun de Landsmeester.

Szymaniak hett van 1956 bit 1966 43 Lännerspelen makt un dorbi 2 Doren schaaten. Bi de Weltmeesterschapen 1958 un 1962 weer he ok dorbi. Wegen en Kneipentour nah en B-Lännerspeel hett hüm Helmut Schön 1966 ut de Natschonalmannschap rutschmeeten, un de Düütsch Footballbund hett sück nahderhand ok nich mehr um hüm kümmert. Inlaaden is he to nix mehr wurrn. Dorbi wurr he sogor 1965 in de Weltutwahl beropen.

1965/66 hett he mit Tasmania Berlin sogor noch in de Bundsliga speelt. Se sünd aber ok sang- un klanglos afsteegen. Dornah is he in de Swiez to’n FC Biel wesselt un hett sien Karriere in de USA utklingen laaten un in Düütschland noch bi en paar Amateurvereens speelt.

Nah sien Karriere weer he u. a. Busfohrer un Bademeester.

Weblenken

Op Wikiquote gifft dat Zitaten to, över oder vun „Horst Szymaniak“ (hoochdüütsch).