Hydrid

As Hydriden warrt de chemisch Verbinnen vun’n Waterstoff betekend. Fröher hett man en Verbinnen blots Hydrid nöömt, wenn de Waterstoff dorbinnen de Oxidatschoonstall -1 har. Dat wöörn gröttstendeels Verbinnen von Waterstoff mit de bannig elektronegativen Metallen ut de 1. und 2. Hööftgrupp. Hüüt warrt aver so good as all Verbinnen Hydrid nöömt, wo Waterstoff binnen is. Dat gifft veer Oorden von Hydriden:

1. Kovalente Hydriden
2. Soltortige Hydriden
3. metallische Hydriden
4. komplexe Övergangsmetallhydriden

So ganz scharp laat sik ober de ünnerscheedlich Typen nich trennen, as de Binnens sik nich von een op den annern ännert, man langsom von en to’n annern wesselt.

Kovalente Hydriden

Disse Oort von Hydriden sünd Waterstoffverbinnen mit de Half- und Nichmetalle ut de drüdden bit sövten Hööftgrupp. Bi Normalbedingen sünd dat meist Gasen oder Fletigkeiten. De wichtigsten Verbinnen von dissen Typ sünd de Kohlenwaterstoffen. De Polarität hingt von den Reakschoonspartner af. Dat gifft:

• Verbinnen mit positiven Waterstoff, wo de Waterstoff de Oxidatschoonstall +1 hett. Biespieele sünd ü.a. Water (H₂O), Ammoniak (NH₃) un Chlorwaterstoff (HCl). Dorbi hett de Waterstoff Süürfunkschoon un reageert as Oxidatschoonsmiddel.
• Verbinnen mit negativen Waterstoff, wo de Waterstoff also de Oxidatschoonstall -1 hett. Dat is bi de kovalenten Binnen ober meer as Sünnerfall antokieken. Een Biespiel sünd de Boranen. De Waterstoff hett hier enn basische Funktschoon und wirkt as Redukschoonsmiddel.
• Verbinnen de en swag polare Waterstoffbinnen opwiest. Dat gifft dat vör allen bi de Kohlenwaterstoffen, bi welke de Verbinnen as unpolar ankeken warrt. De Waterstoff hett hier ok de Oxidatschoonstall +1.

Soltortige Hydriden

Soltortige Hydriden sünd Ionenverbinnen, wobi de Waterstoff as H^- vörliggt. Mit bedeeligt sünd dorbi de Metallen ut de 1. un 2. Hööftgrupp, aver ahn dat Beryllium. Disse Hydriden kristalliseert in en Ionengidder. Se warrt veel as Redukschoonsmiddel för organisch Verbinnen bruukt.

metallisch Hydriden

Bi de metallischen Hydriden warrt de Waterstoff in dat Metallgidder vun Övergangsmetallen inlaagert. Dorbi warrt de Struktur von dat Gidder verännert un gliektietig ok de elektronischen Egenschoppen. Metallhydriden sünd meist hoochexplosiv.

komplexe Övergangselementhydriden

Von disse Sort gifft dat bannig veel. Se sünd tohopensett ut een H^--Ion, een Övergangselement (M) un een elektropositiv Metall (A) un hebbt in allgemen de Formel A_xM_yH_z. Disse Verbinnen kristalliseert in een Kristallgidder, dat komplexe Anionen inbaut.