Jakobus de Jüngere

Jakobus de Jüngere († um 62 in Jerusalem?) weer de jüngere vun de beiden Apostels mit Naam Jakobus. To’n Unnerscheed vun den öllern Jakobus hett he den Binaam „de Jüngere“ kregen. Anners warrt he ok na sien Vadder „Jakobus, Alphäus sien Söhn“, nömmt.

Bibel

He steiht in de Bibel blot in de Apostellisten Matthäus 10,3; Markus 3, 18; Lukas 6,15 un Apostelgeschicht 1,13.^[1] Dor heet he „Jakobus, Alphäus sien Söhn“, gegen den annern Jakobus over, de dor „Jakobus, Zebedäus sien Söhn“ nömmt warrt.

Graff

Sien Graff schall in de Stadt Rom, in de Basilika Santi Apostoli ween.

Noch annere Lüde in de Bibel mit Naam Jakobus

In de Karkengeschicht is dat vorkamen, dat Alphäus sien Söhn ok as Jakobus de Lüttje ankeken wurrn is. Annere menen, he weer desülvige ween, as Jakobus de Gerechte, de Broer vun Jesus.

Jakobus de Lüttje warrt in dat Bibelbook blot man eenmol nömmt (Matthäus 27,56). Dor heet dat, he weer de Söhn vun en Jüngersche mit Naam Maria un he weer de Broer vun en Mann mit Naam Joses. De Karkentraditschoon hett nu seggt, düsse Maria weer desülvige, as „den Kleophas siene Maria“ ut dat Evangelium na Johannes (Joh. 19,25). To’n Deel is in de Traditschoon düsse Maria to en Halfsuster vun Jesus siene Mudder Maria maakt wurrn. Dor keem denn noch to, dat Kleophas as Broer vun Jesus sien Vadder Joseph ankeken wurrn is. Ut de Bibel is dat so nich rut to finnen.

Dat annere Lüde em as Jesus sien Broer ankeken hefft, kummt dor vun her, dat na de kathoolsche Traditschoon de Bröer vun Jesus, de in de Bibel nömmt weert, as siene Cousins ankeken weert. Dor hannelt sik dat um Jakobus, Simeon, Judas un Joses bi. Vunwegen de Tendenz, dat all Figuren in de Bibel mit lieken Naam as desülvigen Personen ankeken wurrn sünd, sünd denn Simon, Judas un Joses overeen sett wurrn mit de Apostels Simon Zelotes, Judas Thaddäus un Joseph Barnabas ut de Apostelgeschicht. As en föfften Broer is denn noch Matthäus hento nahmen wurrn, vunwegen dat dat woll desülvige is, as de Töllner Matthäus, Alphäus sien Söhn, ut dat Matthäusevangelium. Grund for düsse ganzen Denkoperatschonen is de Gloven vun de kathoolsche Karken, Maria, Jesus siene Mudder, weer Jumfer ween un ok as Jumfer storven. Vundeswegen hett se, na Jesus, keen annere Kinner hebben drofft. Un Jesus, so seggt dat de kathoolsche Lehr, hett se „sunner Placken“ annahmen.

Verehrung

Vunwegen dat Jakobus, Jesus sien Broer, mit en Küül dootslahn wurrn is, is bi de Biller vun Jakobus vun dat Middeloller af an, de Apostel Jakobus meist mit en Küül afbillt. He warrt as Schutzpatroon un Natschonalhilligen vun Uruguay ankeken.

Denkeldag

Kathoolsch: 3. Mai, tohopen mit Philippus
Evangeelsch: 3. Mai
Anglikaansch: 1. Mai
Orthodox: 9. Oktober

Belege

↑ Eckhard J. Schnabel: Urchristliche Mission, TVG, 2002, S. 263

Weblenken

Jakobus de Jüngere. Mehr Biller, Videos oder Audiodateien to’t Thema gifft dat bi Wikimedia Commons.

Indrag to de Person in dat Biograafsch-Bibliograafsch Karkenlexikon (hoochdüütsch)

Apostels

[1] Eckhard J. Schnabel: Urchristliche Mission, TVG, 2002, S. 263

[1]