James Arthur Lovell

James Arthur „Jim“ Lovell, Jr. (* 25. März 1928 in Cleveland, Ohio) is en ehmalger US-amerikaansch Astronaut. He weer Baas vun de Mission Apollo 13, de wegen en Explosion up de Weg nah de Maand afbroken wurrn muss.

Anfungen is he as Pilot un Testpilot bi de amerikaansch Marine. He harr sück all för de eerste Astronautengrupp bewurben, dat aber nicht schafft. 1962 wurr he denn aber vun de NASA för de tweete Grupp utsöcht.

Ruumfohrten

Nahdem he bi de Mission vun Gemini 4 as Ersatz vörsehen weer, keem he bi Gemini 7 tosommen mit Frank Borman 1965 to sien eersten Insatz. 14 Daag sünd se in't All bleven, wat een nee Rekord weer un de eerst 1970 överbooden wurrn is.

Mit dat Ruumschipp Gemini 12 is he 1966 tosommen mit Buzz Aldrin um de Eer floogen. Dit Mal weern se aber blots 3 Daag in't All.

As nächst keem dat Apollo-Programm. Präsident John F. Kennedy harr ja toseegt, dat de Amerikaners bit Enn'n vun de 60er Johren up de Maand landen deen un dat Apollo-Ruumschipp sull Astronauten dor hennbringen. Lovell weer Pilot vun Apollo 8. Tosommen mit Bill Anders und Frank Borman is he 1968 eerstmals mit en Ruumschipp Richtung Maand floogen un hett de umkreist. Dat weer bannig spannend, wiels man nich wuss, wu dat utgahn dee, aber dat gung all glatt un dat weer en bannig grooten Erfolg. Över 400 km weern se vun de Eer af, en Rekord, de ok 2007 noch nich broken wurrn is.

Sien veerte Mission weer denn Apollo 13. Dit Mal flogen Fred Haise un Jack Swigert mit. Eerst harr Ken Mattingly mitfleegen sullt, aber de harrn se rutnommen, wiels se meenen, dat he Rötels harr. Swigert hett hüm denn ersett. Haise un Lovell sullen up de Maand lannen. Aber up de Floog nah de Maand explodeer een Deel vun dat Ruumschipp. So kunnen se blots nah de Maand henfleegen un glieks weer torüchkommen. De Mannschap muss ok all utstellen, wat Stroom freeten de, wiels se blots noch 'n beeten wat harrn, dormit se överhaupt lannen kunn. Dordör weer dat ok bannig kolt in de Landekapsel (dorhen mussen se umstiegen), so dat se en fixen Verkollen kregen hebbt. Dat ganze weer binah en Katastroph wurrn, aber dat gung denn doch all good.

Tiet nah de NASA

1973 hett Lovell de NASA den verlaten. Later henn hett tosommen mit Jeffrey Kluger dat Book Lost Moon schreben, wat denn nahst Grundlaag för de Film Apollo 13 mit de Schauspeler Tom Hanks as Lovell weer. Lovell sülvst, de de eerste Minsch mit veer Rumflüüg weer, speel ok en lütten Rull in de Film.

Literatur

Jim Lovell, Jeffrey Kluger: Apollo 13, Goldmann (September 2001), ISBN 3-442-42998-6

Weblenken

NASA-Biografie (engelsch)
JSC Oral History Project: En NASA-Interview vun 1999, 67 Sieden, 163 KB in PDF-Formaat (engelsch)
Lovell bi spacefacts.de (hoochdüütsch)