Jean-Pierre Beltoise

Jean-Pierre Maurice Georges Beltoise (* 26. April 1937 in Paris, Frankriek; † 5. Januar 2015 in Dakar, Senegal) weer en franzöösch Motorrad- un Automobilrennfohrer. He weer Schwager van den Rennfohrer François Cevert, mit den he bi Sportwagenrennen mehrfack en Fohrerpaar billen dee.

Jean-Pierre Beltoise 1969

Loopbahn

Motorradsport

Beltoise fung sien Loopbahn in‘n Motorradsport an un weer Anfang van de 1960er Johren en van de spoodriekst franzöösch Motorradsportler. He wunn 1961 bit 1964 veermal in’n Reeg de franzöösch Motorrad-Meesterschap in de Klass bit 125 cm³, dorto in de glieker Johren dreemal den Titel in den Klassen bit 175 cm³ un bit 250 cm³ un eenmal in de 500-cm³-Klass. Dorto nehm he an Motorrad-Weltmeesterschapen dee. Sien best Platz an’t Enn’n van de Saison weer Platz 6 in de Saison 1964.

Automobilsport

Monopostos

1965 wunn he de franzöösch Formel-3-Meesterschap un steeg dornah in de Formel 2 up. Dor geev he 1966 neben Jo Schlesser bi Matra Sports sien Debüt in de Formel-2-Europameesterschap, de he 1968 mit en Matra MS7 wunn. 1966 geev he sien Debüt in de Formel 1.

1968 keem he denn för Matra eerstmals in de Punkteränge un keem in dat Johr up Platz 9 in de Fohrerwertung.

Jean-Pierre Beltoise im Matra MS11 beim Großen Preis von Deutschland 1968 auf der Nürburgring-Nordschleife

1969 wessel Beltoise to Matra International. He wurr Teamkolleeg van Jackie Stewart, de in dat Johr de Weltmeesterschap wunn, wiels Beltoise in de Gesamtwertung up Platz 5 keem, dat best Ergevnis in sien Loopbahn.

1970 kehr Beltoise to dat Matra-Werksteam torüch. Sien Platz bi Tyrell hett in dat Fröhjohr 1970 sien Schwager François Cevert övernommen. Bi Matra leeten sien sportliche Erfolge nah. 1970 keem he mit 16 Punkten up Rang negen van de Fohrerwertung, 1971 mit blots noch een Punkt up Rang 22.

Van 1972 bit 1974 is Beltoise 40 Rennen för dat B.R.M.-Team fohren. In sien eerst Johr reck he dorbi sien eenzigen GM-Sieg in Monaco (vör Jacky Ickx un Emerson Fittipaldi).

Beltoise hett bi sien 86 Insatzen in de Formel 1 insgesamt 77 WM-Punkte haalt. Veermal hett he de flinkste Runn fohren.

Sportwagenrennen

Matra Simca 670C von Beltoise un Jean-Pierre Jarier bi dat 1000-km-Rennen up den Nürburgring 1974

Af 1963 is Beltoise ok Sportwagenrennen fohren. 1964 harr he en sworen Unfall bi dat 12-Stunden-Rennen för Sportwagen van Reims, bi dat he sück en Arm braken hett. In‘n Januar 1971 weer Beltoise bi en Sportwagenrennen in Buenos Aires an en sworen Unfall bedeeligt, bi de Ignazio Giunti to Dood keem. Beltoise harr den Tank vun sien Matra losfohren un wull den Wagen dwars över de Teelgerade to de Boxen schuuven. Giunti is mit den Matra tosommenknallt, de Autos keemen in Brand un Giunti is in’t Krankenhuus an sien swoor Verbrennungen storven. Beltoise muss en Geldstraaf betallen un verlor tietwies sien Rennlizensen.

Nah sien aktiv Karriere is Beltoise denn noch Tourenwagenrennen fohren un wunn in’n Rallycross 1979 noch den franzööschen Meestertitel.

Privatleven

1966 keem Beltoises sien eerst Ehfru Éliane bi en Autounfall to Dood. In dat folgend Johr hett he Jacqueline Cevert, de öllere Süster van den lateren Grand-Prix-Piloten François Cevert heiraadt. Beltoise un Cevert weern eng befrüend. Beid sünd deelwies as Teamkollegen bi Sportwagenrennen antreeden. Jean-Pierre Beltoise harr twee Söhns, Anthony un Julien Beltoise, de beid ok Rennfohrer weern. Beltoise is an’n 5. Januar 2015 wiels en Urlaub in de Hööftstadt vun den Senegal, Dakar, infolg van twee Slaganfälle in dat Öller van 77 Johren storven.

Weblinks

Jean-Pierre Beltoise. Mehr Biller, Videos oder Audiodateien to’t Thema gifft dat bi Wikimedia Commons.

• Beltoise sien offizielle Websiet (franzöösch)