Jesus Ken
Jesus Ken (* 29. Februar 1932 in Xaibe) is en Politiker ut Brietsch-Honduras/Belize (PUP).
Ken is 1932 as Söhn von Anastacia un Domingo Ken in dat Maya-Dörp Xaibe boren.[1] De Familie weer dor as Flüchtlinge ut Mexiko henkamen.[1] Sien Grootvader Bernardino Ken harr in’n Kastenkrieg as Anföhrer för de Maya fuchten.[1] Ken weer in Xaibe op de Grundschool un denn op de St. Francis Xavier School in Corozal.[1] He is aver al na de sösste Klass von sien Vader von de School nahmen worrn un hett in’n Laden von sien Vader in Xaibe mitarbeidt.[1] En poor Johr later is he denn as Arbeider in de Welt tagen un hett an verscheden Öörd in Belize un Mexiko arbeidt.[1] In Zoh-Laguna (Campeche) hett he in en Saagwark arbeidt un he weer Arbeider in de Zuckerindustrie in’n Noorden von Belize un de Zitrusindustrie in’n Süden von Belize.[1] Ken hett sik dorbi för de Rechten von de Arbeiders insett.[1] He hett an’t Enn von de Johren 1950 de Northern Cane Workers Union grünnt (eerst 1961 offiziell indragen) un weer Vörsitter von düsse Gewerkschaft.[1]
Dör sien Strieden för de Rechten von de Arbeiders keem he in Kuntakt mit George Cadle Price un is 1960 in de People’s United Party (PUP) intreden.[1]
Bi de Parlamentswahl in Brietsch-Honduras 1961 weer he Kannedaat för de PUP in’n Wahlkreis Corozal Süüd un hett de Wahl mit 85,7 % von de Stimmen gegen Victor Greenwood von de NIP wunnen.
Dormit weer he von 1961 bet to’n 31. Dezember 1963 Afornten von de Legislativversammlung, de to’n 1. Januar 1964 in dat Repräsentantenhuus övergahn is. Ken weer denn noch bet 1965 Maat von dat Repräsentantenhuus.
Ken is Vörsitter von de Northern Cane Workers Union bleven, bet George Cadle Price un Mateo Ayuso sik dorför insett hebbt, dat he düt Amt 1963 afgeven müss. Sien Nafolger weer denn Florencio Marin Sr.
1965 is Ken Maat von’n Senaat worrn.
Von 1998 bet 2003 weer he Clerk von de Natschonaalversammlung.