João Galego

João Galego is en Oort in’n Noordoosten vun dat Eiland Boa Vista in de Republiek Kap Verde.

Dat Dörp João Galego mit sien dröög Land vun’n Süüden her fotografeert.

Geografie

João Galego is en teemlich lütt un eenfach Dörp in de Neeg vun Fundo Figueiras un Cabeço dos Tarafes ruchweg 30 km wiet weg vun de Hööftstadt vun’t Eiland, Sal Rei. De dree lütten Öörd warrt tomeist tohopen faat ünner den Begreep Norte – wietere Öörd gifft dat in de negere Ümgegend nich. Dat Dörp liggt an de Straat, de vun Norte na Sal Rei föhrt.

De Oortschap liggt in’t wööstordige Klima vun Boa Vista un krigg dorüm blots wenig Nedderslag in’t Johr. Dat gifft aver ok Johren, wo dat nich eenmol regent. Ackerbo oder Veehtucht is dorüm meist gor nich to finnen, blots man en beten Aaft un ’n beten Rindveeh. Versorgt warrt de Oort mehrstendeels ut de annern Rebeden vun de Republiek. De Gegend üm João Galego is tomeist Wööst, dat in’n Daalrebeet liggt mit högeret Land na’n Westen un na’n Noorden un eenige Bulten un lütte Bargens in’n Süüden. De Koordinaten sünd 16°09’ N un 22°45’ W.

Dat Dörp höört to de pulterigsten vun’t Eiland. De meisten Hüüs sünd ut Zement un Steen boot, man, enige bestaht ok blots ut Lehm un Tegels. En zentrale Stroomversorgen is noch nich bit João Galego leggt worrn, un ok en Telefonleitung is noch nich för jeden togänglich.