Johann Kittel (Theoloog)

Johann Kittel (* 1519 in Jüterbog; † 1590 in Danzig) weer en Theologen un Perfesser in Rostock.

Kittel is 1519 in Jüterbog boren un hett in Wittenberg studeert. 1539 hett he dor sien Baccalaureus in Philosophie maakt. Vun 1550 af an weer he Pastoor in Brannenborg. In’n November 1560 hett em de Stadt Rostock as Superintendent un as Perfesser för Theologie an de Universität Rostock beropen. De Stadt weer so’n beten in Striet mit Hertog Ulrich, ’keen de Superintendenten beropen dröff. Rostock harr vörher al Johann Draconites beropen, den se aver ok nich dörsetten kunnen. Kittel schull nu toeerst mit Simon Pauli un David Chyträus tohoop sien Dokter maken un denn 1561 dat Amt övernehmen. Sien Dokter hett he an’n 15. April 1561 vun de Perfessers Georg Venetus un Jakob Runge kregen. As Superintendent hett he aver glieks Arger kregen. He weer na Lünborg op en Konvent reist un harr dor in’n Namen vun Rostock spraken, ofschoonst he sik nich mit de annern Predigers vun Rostock afsnackt un keen Vullmacht harr. Al 1562 hett he sien Amt dör de Querelen twischen Stadtraat un Hertog wedder opgeven müsst.

He güng denn na Lübben (Spreewald) un weer dor bet 1566 Offizial. Vun 1567 af an bet to sien Dood 1590 weer he denn Senior vun dat Geistliche Ministerium in Danzig.