John Denver

John Denver (* 31. Dezember 1943 in Roswell, New Mexico as Henry John Deutschendorf; † 12. Oktober 1997 in de Monterey-Bucht, Kalifornien) weer en US-amerikaansch Country- un Folk-Singer.

John Denver (1973)

Jöögdtied

Sien Vader weer Luftwapenpilot un op de Basis vun Roswell in New Mexico statschoneert. De Leev to dat Flegen bleev sien Leevdag. Sien Kinnertied weer vun vele Oortswessel dör den Beroop vun sien Vader präägt. Fröh lehr he op en ole Gibson, de he vun siene Grootmoder schenkt kreeg, Gitarr spelen. He süng in'n Karkenchor un speel in lokale Rock-Bands. In de Tied vun sien Architektur-Studium in Lubbock in Texas hett he siene eersten Optreed.He weer so vun Musik begeistert, dat he 1964 dat Studium afbreek un no Los Angeles toog, üm sik dor de Folk-Szeen antosluten. Hier arbeid he den Dag över as Technisch Tekner un speel an'n Avend in Folk-Klubs. Sienen för Amerikaner swoor utspreekboren Namen "Henry John Deutschendorf" änner he op Anraden vun Frünnen in "John Denver".

Loopbahn

1965 bemöh he sik üm en fre'en Platz in dat Chad Mitchell Trio. He sett sik gegen 250 Mitbewarver dör un wörr engascheert. He füng nu ok an to komponeren. För siene ne'e Grupp schreev he dat Leed Leaving On A Jet Plane. Dat Leed komponeer he för Peter, Paul and Mary un güng op Platz een in de US-Hitparaad. Chad Mitchell verleet bald dorop dat Trio un de Grupp nööm sik nu Denver, Boise and Johnson. 1967 heirad he Anne Martell. Twee Johr later breek de Band utenanner un Denver toog mit siene Fro in de Rocky Mountains.

Sien Manager, Jerry Weintraub, vermiddel em 1969 enen Schallplattenverdrag bi RCA. Dat sülve Johr keem sien eerst Album rut: Rhymes And Reasons. Dat Album verkööp sik blots slecht, as ok de nesten Produktschonen Whose Garden Was It un Take Me Tomorrow. Doch een Leed möök em 1971 to en Superstar: Take Me Home, Country Roads. De Single wörr mit Gold un dat to de lieke Tied rutkamen Album Poems, Prayers And Promises mit Platin uttekent. In vele Länner störm Take Me Home, Country Roads de Hitparaden un wörr weltwiet to een vun de bekanntesten Leder in de 1970er Johren.

In'n Februar 1995 nehm John Denver in New York in de Studios vun Sony Music en twee Stünnen duern Live-Studioalbum vör en internatschonaal Publikum op. Dat Wildlife Concert wörr mit Hülp vun James Burton, en bekannten Gitarristen, un Jim Horn, en bekannten Saxofonspeler, opnahmen.

Warken as Ümwelt- un Fredensaktivist

Al op siene Alben in de 1970er Johren harr John Denver jümmer weer Ümwelthemen opgrepen. In de 1980er Johren wörr sien Insatz gegen de Ümwelttostören grötter. He arbeid aktiv bi welke ökoloogschen un humanitären Projekten mit. 1985, noch to de Tied vun'n Kolen Krieg, wörr he as een vun de eersten Musikstars ut den Westen in de Sowjetunion inladen. Dat Afrüstensleed Let Us Begin wörr dör dissen Besöök inspireert. Een Johr later möök he en gröttere Tour dör de UdSSR. 1992 folg en Tour dör China. In siene Heimat leet siene Popularität langsam no, ofschoonst siene Schallplatten wieder goot verkööpt wörrn. Siene Eh mit Anne keem 1983 to Enn, eventuell op Grund vun sien Alkoholproblemen.

An'n 12. Oktober 1997 stört de begeisterte Fleger mit en vun em sülvst flagenen Lichtfleger af un starv. De offiziell Oorsaak weer Kerosinmangel. Dat warrt seggt, dat de vun den Luftfohrtpionier Burt Rutan boote Versööksfleger swore Konstruktschoonsmängel an de Tankanlaag harr un ok al annere Piloten vun den Fleger den Dood funnen harrn.

Alben

• 1969 - Rhymes and Reasons
• 1970 - Take Me To Tomorrow
• 1970 - Whose Garden Was This?
• 1971 - Poems, Prayers and Promises
• 1972 - Aerie
• 1972 - Rocky Mountain High
• 1974 - Farewell Andromeda
• 1974 - John Denver’s Greatest Hits
• 1974 - Back Home Again
• 1975 - An Evening With John Denver
• 1975 - Windsong
• 1975 - Rocky Mountain Christmas
• 1976 - Spirit
• 1977 - John Denver’s Greatest Hits, Volume 2
• 1977 - I Want To Live
• 1977 - John Denver
• 1979 - A Christmas Together
• 1980 - Autograph
• 1981 - Some Days Are Diamonds
• 1982 - Seasons Of The Heart
• 1982 - Rocky Mountain Holiday
• 1983 - It’s About Time
• 1984 - John Denver’s Greatest Hits, Volume 3
• 1985 - Dreamland Express
• 1986 - One World
• 1989 - Higher Ground
• 1990 - Earth Songs
• 1990 - The Flower That Shattered The Stone
• 1990 - A Christmas Together
• 1990 - Christmas, Like A Lullaby
• 1991 - Different Directions
• 1994 - John Denver – Country Roads
• 1996 - John Denver – Love Again