Joseph Edward Murray

Joseph Edward Murray (* 1. April 1919 in Milford, Massachusetts; † 26. November 2012 in Boston, Massachusetts) weer en US-amerikaansch Chirurg un Pionier vun de Nierentransplantatschoon. 1990 kreeg he tosommen mit Edward Donnall Thomas den Nobelpries för Physiologie oder Medizin „för hör Inführen vun de Methode vun dat Överdragen vun Geweev un Organen as klinisch Behannelnspraxis in de Humanmedizin“.

Leven

Murray studeer an dat Holy Cross College (Bachelor 1940) un de Harvard Medical School (Afsluss 1943). He hett sück plastische Chirurgie spezialiseert un weer – nah Wehrdeenst in' Tweeten Weltkrieg, wo he völ Verbrennungen behannelt hett – an dat Peter Bent Brigham Hospital (later Brigham and Women's Hospital) in Boston, wo he van 1964 bit 1986 de plastische Chirurgie leiten dee. Van 1955 bit 1966 weer he Baas vun dat Labor för chirurgische Forschung an de Harvard University un dat Peter Bent Brigham Hospital. Buterdem weer he van 1972 bit 1985 Leit vun de plastisch Chirurgie an dat Children’s Hospital Medical Center in Boston. Van 1970 bit 1986 weer he Perfesser för Chirurgie an de Harvard Medical School.

An Nierentransplantatschonen wurr an dat Peter Bent Brigham Hospital all länger forscht, man harr aber immer weer Gegenstötten harrt. De Baas vun de Chirurgie Francis Daniels Moore, de Murray as plastischen Chirurgen instellt harr, hett hüm denn de wiedere Entwicklung överdragen. An' 23. Dezember 1954 gelung hüm de eerste spoodoriek Nierentransplantatschoon tüschen twee eeneiig Twillings. De Patient Richard Herrick, dormals 23 Jahre olt, harr Glomerulonephritis in' Endstadium. Nah de Operatschoon hett he sück weer verhaalt, is aber en poor Johr later weer doran erkrankt un 1963 an en Lungenentzündung storven. 1956 transplanteer he de dormals 21-johrigen Edith Helm en Niere vun hör Twillingssüster. Edith Helm hett sück good nah de Operatschoon verhaalt, broch een Johr later en Kind up de Welt un is eerst 2011 mit 76 Johren storven.

1962 gelung Murray de Transplantatschoon dör Immunsuppression ok bi genetisch nich identen Personen. Dorto muss de Immunafwehr vun den Patienten gegen dat Spenderorgan ünnerdrückt wurrn, wat Murray tonächst mit massiv Röntgenbestrahlen versöcht hett (womit hüm 1959 de spoodriek Nierentransplantatschoon tüschen twee genetisch nich identischen Bröers gelung, wobi de Empfänger 29 Johr överleeven dee) un dornah mit Azathioprin, dessen Insatz he in Tosommenarbeit mit den in Boston to Gast uphollen Roy Yorke Calne utprobeert hett.

Van 1963 bit 1971 weer he Mitherutgever vun dat Journal of Transplantation.

An 26. November 2012 is Murray an de Folgen vun en Slaganfall in dat Bostoner Brigham and Women’s Hospital storven.

Ehrungen

1964–65 weer Murray Präsident vun de American Association of Plastic Surgeons. He weer Liddmaat vun dat Institute of Medicine der National Academy of Sciences. 1983 weer he Viezpräsident vun de American Cancer Society un 1983–84 Viezpräsident vun dat American College of Surgeons. He weer Fellow vun dat Royal College of Surgeons of England un de American Academy of Arts and Sciences.

Priesen

1962 kreeg he den Francis Amory Pries vun de American Association for the Advancement of Science, 1963 de Goldmedaille vun de International Association of Surgeons un 1990 den Lifetime Achievement Award vun de National Kidney Foundation. 1991 kreeg he de Medaille vun American Surgical Association.

Weblenken

• Murray up de Sieden vun den Nobelpries (engelsch)
• Bericht över sein eerst Transplantatschoon (engelsch) PDF
• [2] DNB-Katalog
• Personennaamdatei