Jupp Hussels

Joseph „Jupp“ Hussels (* 30. Januar 1901 in Düsseldörp; † 10. April 1986 in Olenkamp bi Hain) weer en düütschen Schauspeler, Rundfunkspreker un Ünnerholler.

Jupp Hussels in dat Kabarett der Komiker, 1938

As Rundfunk-Ünnerholler stünn he in de Nafolg von Ludwig Manfred Lommel un weer en Vörgänger von Heinz Erhardt.

Leven

Hussels is 1901 in Düsseldörp boren un hett na de School un dat Abitur Kunst studeert. He harr Kuntakten to’n Künstlerkring Das Junge Rheinland un weer Maat von’n Künstlervereen Malkasten. Nadem sien Bühnestück Die wüste Sahara bi’n Malkasten opföhrt worrn is, hett em dat Radio in’e Künn kregen un em as Conferencier för Bunte Abende engascheert, bi de he deelwies ok egen Texten in’n rhienschen Dialekt vördragen hett.

In de Wochenschau-Reeg Tran und Helle ut de NS-Tied (1939/1940) hett Hussels den linientreuen Volksgenossen Helle speelt un Ludwig Schmitz dat Gegenbild von’n unangepasst dummschlauen Egenbrötler Tran.

In de Johren na’n Krieg harr Hussels dat toeerst swoor as Schauspeler un harr blots lüttjere Rullen. In de Johren 1950 weer he as Clever in de Verkehrserziehungs-Reeg Clever und Schussel to sehn (mit Walter Gross as Schussel). In de Johren 1960 un 1970 weer he blangen Willy Millowitsch, Lucy Millowitsch, Elsa Scholten un Lotti Krekel fakener in Feernsehfilmen ut dat Kölner Millowitsch-Theater to sehn.

Hussels weer verheiraadt mit Marianne, borene Bick (13. Juni 1905–4. Juli 1974). Hussels is 1986 in sien Huus in Olenkamp doodbleven un liggt op’n Karkhoff Ohlsdörp begraven.

Filmografie (Utwahl)

• 1935: Einer zuviel an Bord
• 1938: Es leuchten die Sterne
• 1952: Einmal am Rhein
• 1955: Vatertag

Literatur

• Volker Kühn (Rutgever): Deutschlands Erwachen: Kabarett unterm Hakenkreuz ; 1933 - 1945. Band 3. Quadriga, Weinheim 1989, ISBN 3-88679-163-7, Sied 376 (Kurzbiografie)

Weblenken

Jupp Hussels. Mehr Biller, Videos oder Audiodateien to’t Thema gifft dat bi Wikimedia Commons.

• Jupp Hussels in de Internet Movie Database (engelsch)