Königriek Hannover

Dat Königriek Hannover weer en düütschen Staat, de von 1814 bet 1866 bestahn hett. De Hööftstadt weer Hannober.

Koort von dat Königriek

Flagg von dat Königriek Hannover

Wapen von dat Königriek Hannover

Laaneslott in Hannover, Slott von de Könige von Hannover

Historie

Dat Kurförstendom Bruunswiek-Lümborg (oder ok Kurförstendom Hannover) is 1810 Deel von dat Königriek Westfalen worrn. An’t Enn von dat Johr 1810 is en groten Deel denn von dat Königriek Westfalen an dat Kaiserriek Frankriek wesselt. As 1813/1814 de Franzosen wedder verdreven worrn sünd, hebbt sik de olen Staten wedder nee billt. Op’n Wiener Kungress is beslaten worrn, dat ut dat Kurförstendom Hannover en Königriek warrn schull.

Op’n Wiener Kungress is bito beslaten worrn, dat dat Königriek de Rebeden von de Graafschop Lingen, dat Hertogdom Arenberg-Meppen, de Graafschop Bentem, dat Hoogstift Hilmssen, de Stadt Gosler, Delen von dat Ünnereeksfeld un dat Förstendom Oostfreesland tokriggt.

Bet to’n Dood von Willem IV. weer Hannover mit Grootbritannien in Personalunion verbunnen.

In’n Krieg von 1866 stünn Hannover an de Sied von Öösterriek. Nadem Prüßen den Krieg wunnen harr, hebbt se dat Königriek Hannover annekteert. Hannover hett ophöört, as sülvsstännig Staat to existeren, un is ümwannelt worrn in de prüüßsche Provinz Hannover.

Könige

• 1814–1820: Georg III.
• 1820–1830: Georg IV.
• 1830–1837: Willem IV.
• 1837–1851: Ernst August I.
• 1851–1866: Georg V.

Verwaltung

Dat Königriek Hannover weer siet 1823 in Landdrostien indeelt un de füdder in Ämter un Städer. bito geev dat de Barghauptmannschop Clausthal.

• Landdrostie Auerk (Förstendom Oostfreesland un Harlingerland)
• Landdrostie Hannover (Förstendom Calenberg, Graafschop Hoya un Graafschop Deefholt)
• Landdrostie Hilmssen (Förstendom Göttingen, Förstendom Grubenhagen (ahn den Oberharz), Förstendom Hildesheim un Graafschop Hohnstein)
• Landdrostie Lümborg (Förstendom Lümborg)
• Landdrostie Ossenbrügge (Förstendom Ossenbrügge, Graafschop Bentem, Neddergraafschop Lingen, Hertogdom Arenberg-Meppen un de Kreis Emsbüren)
• Landdrostie Stood (Hertogdom Bremen, Hertogdom Verden un Land Hadeln)
• Barghauptmannschop Clausthal

Literatur

• Mijndert Bertram: Das Königreich Hannover – Kleine Geschichte eines vergangenen deutschen Staates. Hahn, Hannover 2003, ISBN 3-7752-6121-4

Weblenken

Königriek Hannover. Mehr Biller, Videos oder Audiodateien to’t Thema gifft dat bi Wikimedia Commons.